అనంతపురం జిల్లాలో రైతు భరోసా కేంద్రాల హబ్లు నిరుపయోగంగా మారాయి. గ్రామాల్లోని ఆర్బీకేలకు ఎరువులు, పురుగు మందులు, విత్తనాలు సరఫరా చేయటానికి డివిజన్లో ఒకటి చొప్పున గోదాములను అద్దెకు తీసుకొని హబ్లుగా ఏర్పాటు చేశారు. మార్కెటింగ్ శాఖ రైతుల కోసం నిర్మించిన గోదాములను హబ్ల కోసం ఏపీ ఆగ్రోస్ సంస్థకు అద్దెకు ఇచ్చింది. ఏపీ ఆగ్రోస్ తొలుత ఐదు గోదాములు అద్దెకు తీసుకొని, 11 నెలలకు అద్దె ఒప్పందం చేసుకుంది. ఈ హబ్లు చాలవని వ్యవసాయ శాఖ మరో ఆరు గోదాములు తీసుకుంది.
మూడు నెలలు మాత్రం ఆగ్రోస్ సంస్థ కొంతమేర ఎరువులు నిల్వచేసి ఆర్బీకేలకు సరఫరా చేసింది. రైతులు ఆర్డర్ చేసిన వారం రోజులకు కూడా ఎరువులు, పురుగు మందులు ఇవ్వలేకపోయారు. దీంతో ఈ వ్యవస్థ విఫలమైనట్లు భావించిన వ్యవసాయశాఖ.. ఎరువుల సరఫరా బాధ్యతను ఆగ్రోస్ నుంచి మార్క్ఫెడ్కు అప్పగించింది. ఈ సంస్థకు అనంతపురం జిల్లా కేంద్రంలో స్వంత గోదాములు ఉండటంతో హబ్లో నిల్వచేసే అవసరం లేకుండా పోయింది. ఈ 11 హబ్లతో తమకు అవసరం లేదని, రైతులకు గ్రామాల్లో అడిగిన వెంటనే ఎరువులు, పురుగు మందులు ఇచ్చేలా ఎక్కడికక్కడ ఆర్బీకేల్లోనే నిల్వ చేస్తున్నట్లు మార్క్ఫెడ్ అధికారులు చెబుతున్నారు.
వ్యవసాయ డివిజన్లోని గోదాముల నిర్వహణ కోసం 11 మంది వ్యవసాయ అధికారులు, వారికి సహాయకులుగా మరో 11 మందిని నియమించారు. ఎరువుల సరఫరా విధానంలో మార్పు రావటంతో 22 మందికి ఆరు నెలల నుంచి ఎలాంటి పని లేదు. మరోవైపు మార్కెట్ యార్డు ఆవరణలో ఉన్న ఈ గోదాములను వ్యవసాయశాఖ తిరిగి వెనక్కి అప్పగించకపోవటం వల్ల రైతుల ఉత్పత్తుల నిల్వకు కూడా ఇబ్బందిగా మారింది. ఇప్పటికే మార్కెటింగ్ శాఖకు ఆగ్రోస్ సంస్థ 30 లక్షలకు పైగా అద్దె బకాయి పడింది. తమ బకాయి చెల్లించాలని మార్కెటింగ్ శాఖ అధికారులు రాస్తున్న లేఖలకు ప్రభుత్వం నుంచి ఎలాంటి స్పందన లేదు. అద్దె బకాయి ఉందని, హబ్లు, వాటిలో అధికారులకు పనిలేకపోవటం వాస్తమేనని ఆగ్రోస్ అధికారులు చెబుతున్నారు.
ఇదీ చదవండి: Mahapadayathra: రెండోరోజు మహాపాదయాత్ర.. కదం కలిపి కదిలిన రైతులు..
