SAFF Championship 2023 : దక్షిణాసియా ఫుట్‌బాల్‌ సమాఖ్య (శాఫ్‌) ఛాంపియన్‌షిప్‌లో భాగంగా జరిగిన టోర్నీలో భారత జట్టుకు అద్భుత ఆరంభం లభించింది. టోర్నీలో ఫేవరెట్‌గా బరిలోకి దిగిన భారత్.. బుధవారం ఆడిన తొలి మ్యాచ్లో 4-0 గోల్స్‌ తేడాతో చిరకాల ప్రత్యర్థి పాకిస్థాన్‌ను మట్టి కరిపించింది. ఇక సూపర్‌ ఫామ్‌లో ఉన్న కెప్టెన్‌ సునీల్‌ ఛెత్రి.. హ్యాట్రిక్ గోల్స్‌తో జట్టును విజయ పథంలోకి నడిపించాడు.
మ్యాచ్లో ఆరంభం నుంచి భారత్ హవానే సాగింది. ఇటీవలే ఇంటర్‌ కాంటినెంటల్‌ ఛాంపియన్‌షిప్‌లో భారత్‌ను గెలిపించిన ఊపులో ఉన్న ఛెత్రి.. అంతే దూకుడుగానే ఈ టోర్నీలో ఆడాడు. అతను 10వ నిమిషంలోనే ఫీల్డ్‌ గోల్‌తో జట్టును ఆధిక్యంలో నిలిపాడు. ఇంకో ఆరు నిమిషాలకే పెనాల్టీని గోల్‌గా మలిచి ఆధిక్యాన్ని రెట్టింపు చేశాడు. ఆ తర్వాత కూడా భారత్ గోల్‌ దాడులు కొనసాగించగా.. ప్రథమార్ధం అయ్యే వరకు మరో గోల్‌ కాకుండా పాక్ అడ్డుకోగలిగింది. ద్వితీయార్ధంలో కూడా ఒకానోక దశ వరకు పాక్ డిఫెన్స్‌ బాగానే పని చేసింది. అయితే 74వ నిమిషంలో పాక్ ఆటగాళ్లు ఛెత్రిని కింద పడేయడం వల్ల రిఫరీ పెనాల్టీ కిక్‌ ఇచ్చాడు. ఇక ఆ అవకాశాన్ని అందిపుచ్చుకున్న ఛెత్రి పొరపాటుకు తావివ్వకుండా దాన్ని గోల్‌గా మలిచి.. పాక్ను అవాకయ్యేలా చేశాడు. ఇంకో ఏడు నిమిషాలకే సబ్‌స్టిట్యూట్‌ ఉదంత సింగ్‌ గోల్‌ కొట్టడం వల్ల భారత్ మరింత ఘనంగా మ్యాచ్‌ను ముగించింది. శనివారం ఛెత్రిసేన తన తర్వాతి మ్యాచ్లో నేపాల్‌ను ఢీకొంటుంది.
భారత కోచ్‌కు రెడ్‌ కార్డు: భారత్, పాక్ మ్యాచ్ అంటే ఏ ఆటలో అయినా ఉద్వేగాలు అనేవి సహజం. కానీ కొన్ని సార్లు అవి పతాక స్థాయికి చేరుతుంటాయి. శాఫ్‌ కప్‌ ఆరంభ మ్యాచ్‌లోనూ సరిగ్గా అలాగే జరిగింది. ప్రథమార్ధం కాసేపట్లో ముగుస్తుందన్న సమయంలో.. భారత్, పాక్ ఆటగాళ్ల మధ్య ఉద్రిక్తత వాతావరణం నెలకొంది. పాక్ ఆటగాడు బంతిని విసరబోతుండగా.. సమీపంలో నిలబడ్డ భారత కోచ్‌ ఇగార్‌ స్టిమాక్‌ చేత్తో వెనుక నుంచి దాన్ని నెట్టేశాడు. దీంతో రిఫరీ అతడికి రెడ్‌ కార్డు చూపించాడు. ఆ తర్వాత భారత్, పాక్ ఆటగాళ్లు పరస్పరం వాదించుకుంటూ.. ఒకరినొకరు నెట్టుకుంటూ కనిపించారు.
ఛెత్రి.. ఆసియా నంబర్‌ 2
Sunil Chhetri Goals : ఆసియా ఫుట్‌బాల్‌లో అత్యధిక అంతర్జాతీయ గోల్స్‌ సాధించిన ఆటగాళ్లలో భారత కెప్టెన్‌ సునీల్‌ ఛెత్రి తన స్థానాన్ని పొందుపరుచుకున్నాడు. ఈ జాబితాలో ఆయన రెండో స్థానానికి చేరుకున్నాడు. బుధవారం పాకిస్థాన్‌తో జరిగిన శాఫ్‌ కప్‌ మ్యాచ్లో హ్యాట్రిక్ సాధించడం వల్ల అతడి గోల్స్‌ సంఖ్య 90కి పెరిగింది. అతడికి ఇది 138వ మ్యాచ్. మొక్తార్‌ దహారి (మలేసియా)ను అతను అధిగమించాడు. దహారి 142 మ్యాచ్‌ల్లో 89 గోల్స్‌ సాధించగా.. ఇరాన్‌ ఆటగాడు అలీ డాయ్‌ 149 మ్యాచ్‌ల్లో 109 గోల్స్‌తో అగ్రస్థానంలో కొనసాగుతున్నాడు.
