చెస్ ఒలింపియాడ్లో భారత్ స్వర్ణం సాధించి ఎన్నో ఏళ్ల కలను సాకారం చేసింది. తొలిసారిగా ఆన్లైన్ పద్ధతిలో నిర్వహించిన ఈ టోర్నీలో రష్యాతో హోరాహోరీగా తలపడింది భారత జట్టు. సాంకేతిక సమస్యలతో నిర్వాహకులు రెండు దేశాలను విజేతలుగా ప్రకటించారు. భారత్ తరఫున పాల్గొన్న 14 మందిలో ప్రజ్ఞానంద ఒకరు. తాజాగా తన అనుభవాన్ని ఈటీవీ భారత్తో పంచుకున్నాడు.
ప్ర: చెస్ ఒలింపియాడ్లో భారత్ స్వర్ణం సాధించడం ఇదే మొదటిసారి. ఈ గొప్ప ఘనతను మీరు ఏ విధంగా భావిస్తున్నారు?
నాకు చాలా సంతోషంగా ఉంది. నా పాఠశాల, కోచ్ రమేశ్, స్పాన్సర్స్ తదితరులు నాకు మద్దతుగా నిలిచారు. వారందరికీ ధన్యవాదాలు. ఈ చారిత్రక విజయంలో నేను కూడా భాగస్వామినవ్వడం నిజంగా గొప్ప అనుభూతి.
ప్ర: కరోనా పరిస్థితుల మధ్య టోర్నమెంట్ కోసం ట్రైనింగ్ను ఎలా తీసుకున్నారు?
నా కోచ్ రమేశ్ ఆన్లైన్లో శిక్షణ ఇచ్చారు. రోజూ ప్రత్యేక క్లాసులు తీసుకునేవారు. లాక్డౌన్ కారణంగా నేను కూడా ఆన్లైన్ శిక్షణకు అలవాటుపడ్డా.
ప్ర: చెస్ ఒలింపియాడ్ ఆన్లైన్లో నిర్వహించడం ఇదే తొలిసారి కదా. మీ అనుభవాన్ని పంచుకుంటారా?
ఎలాంటి ఆన్లైన్ పోటీల్లోనైనా ఇంటర్నెట్ కనెక్టివిటీ పెద్ద సమస్య. అంతర్జాల సేవలో అంతరాయం ఉన్నందునే.. భారత్ మూడు ఆటల్లో దురదృష్టవశాత్తు ఓడిపోవాల్సి వచ్చింది. ఆ తర్వాత ఒక యాప్ను డౌన్లోడ్ చేశాం. అప్పుడు కనెక్టివిటీలో ఎటువంటి సమస్య రాలేదు.
ప్ర: టోర్నమెంటులో సీనియర్లతో పోటీపడ్డారు. అగ్రశ్రేణి ఆటగాళ్లు ఉన్న జట్టులో మీరు ఉన్నారు. వారి నుంచి మీరు ఏం నేర్చుకున్నారు.?
ఆట గురించి చర్చించడానికి విశ్వనాథన్ ఆనంద్ ఇంటికి చాలాసార్లు వెళ్లా. అయితే, ఆన్లైన్లో నిర్వహించిన ఈ టోర్నమెంటు కోసం నేను ఇతరులతో పెద్దగా చర్చించలేకపోయా. అయితే, ఆట ప్రారంభానికి ముందు మా జట్టులోని తోటి ఆటగాళ్లతో క్లుప్తంగా చర్చించేవాడిని.
ప్ర: చెస్ పట్ల మీకున్న అభిరుచికి కుటుంబం నుంచి ఎటువంటి మద్దతు లభించేది?
నేను శిక్షణ పొందేందుకు ఒలింపియాడ్లో పాల్గొనే ఇతర ఆటగాళ్లతో ఆడటం ప్రారంభించినప్పుడు.. తరచుగా ఇంటర్నెట్ సమస్య ఎదుర్కొన్నా. ఇది చూసి నా తల్లిదండ్రులు ఇంట్లో సురక్షితమైన ఇంటర్నెట్ కనెక్షన్ను ఏర్పాటు చేశారు. ఇక ఎటువంటి ఇబ్బంది లేకుండా ఆట సాగింది. మా బంధువులను కూడా ఇంటికి రావొద్దని చెప్పారు. వారు నాకు చాలా మద్దతుగా నిలిచారు. అదే నాలో గొప్ప ధైర్యాన్ని పెంచింది.
ప్ర: ఓ వైపు చదరంగం ఆడుతూ.. చదువుపైనా ఎలా ఏకాగ్రత సాధిస్తున్నారు. రెండింటి మధ్య ఎలా సమతుల్యం పాటిస్తున్నారు?
చెస్ను కొనసాగిస్తూ టోర్నమెంటులో పాల్గొనేందుకు వీలు కల్పించి.. మూడేళ్లుగా నాకు ప్రత్యేక అనుమతి ఇచ్చిన నా పాఠశాలకు కృతజ్ఞతలు తెలియజేస్తున్నా. ఇప్పుడు నేను పదవ తరగతి చదువుతున్నా. చదువుపైనా ఎక్కువ దృష్టి పెట్టాలి.
