94 years old lady wins gold medal: ఏదైనా సాధించాలనుకుంటే.. వయసుతో సంబంధం లేదని నిరూపించింది ఈ 94ఏళ్ల బామ్మ. సాధారణంగా పురుషులకైనా.. మహిళలకైనా 60 ఏళ్లు పైబడితే అనారోగ్య సమస్యలు చుట్టుముడతాయి. ఇక 90 సంవత్సరాల గలవారైతే.. వారి శరీరంలో శక్తి పూర్తిగా సన్నగిల్లి.. నిలబడలేక, కూర్చోలేక ఏ వస్తువునూ పట్టుకోలేక నానా అవస్థలు పడుతుంటారు. కానీ ఈ బామ్మ మాత్రం 'వయసు సంఖ్య మాత్రమే' అని అంటోంది. 94 ఏళ్ల వయసులో పరుగు పందెంలో పాల్గొని బంగారు పతకం సాధించింది. ఈ విజయంతో ఎంతో మందికి స్ఫూర్తిగా నిలిచింది.
ఫిన్లాండ్ వేదికగా జూన్ 29 నుంచి జులై 10వరకు జరిగిన వరల్డ్ మాస్టర్స్ అథ్లెటిక్స్ ఔట్డోర్ ఛాంపియన్షిప్స్ ఘనంగా ముగిశాయి. ఇందులో భారత్కు చెందిన 94ఏళ్ల భగ్వానీ దేవీ దాగర్ అదరగొట్టింది. 100మీటర్ల పరుగు పందెంలో పాల్గొని లక్ష్యాన్ని 24.74 సెకన్లలో ముగించి బంగారు పతకాన్ని సాధించింది. అంతేకాకుండా షాట్పుట్లోనూ పాల్గొని తన సత్తా చాటింది. బ్రాంజ్ మెడల్ను దక్కించుకుంది.
అంతకుముందు ఈ వరల్డ్ మాస్టర్స్ అథ్లెటిక్స్ ఛాంపియన్షిప్స్కు అర్హత సాధించేందుకు చెన్నై వేదికగా జరిగిన నేషనల్ మాస్టర్స్ అథ్లెటిక్స్ ఛాంపియన్షిప్స్లో పాల్గొని మూడు స్వర్ణాలు సాధించి రికార్డుకెక్కింది. ఈమెకు పారా అథ్లెట్, రాజీవ్ గాంధీ ఖేల్ రత్న అవార్డు గ్రహీత వికాస్ దాగర్ మనవడు అవుతాడు.
ఇదీ చూడండి: మీకు క్రికెట్‌లో కొత్త రూల్స్‌ తెలుసా...? అక్టోబర్‌ నుంచే అమలు...
