వర్షం కారణంగా నాటింగ్హామ్ టెస్టు డ్రాగా ముగిసింది. ఎడతెరిపి లేకుండా కురిసిన వాన వల్ల ఐదో రోజు ఒక్క బంతి పడలేదు. దీంతో మ్యాచ్ను ముగిస్తున్నట్లు ఫీల్డ్ అంపైర్లు ప్రకటించారు.
విజయానికి 157 పరుగుల దూరంలో ఉన్న టీమ్ఇండియా రెండో ఇన్నింగ్స్లో ఒక వికెట్ నష్టానికి 52 పరుగులు చేసింది. చివరి రోజు ఆట జరిగితే గెలుపు లాంఛనమేనని భావించిన కోహ్లీ సేనకు వరుణుడి రూపంలో భంగపాటు ఎదురైంది.
ఇంగ్లాండ్ తొలి ఇన్నింగ్స్లో 183 పరుగులకు ఆలౌట్ కాగా.. ప్రతిగా భారత్ 278 పరుగులు చేసింది. రెండో ఇన్నింగ్స్లో ఇంగ్లాండ్.. 303 పరుగులు చేసి.. టీమ్ఇండియా ముందు 209 పరుగుల లక్ష్యం ఉంచింది.
ఆకట్టుకున్న రాహుల్..
ఈ మ్యాచ్లో ఓపెనర్గా జట్టులో చోటు దక్కించుకున్న కేఎల్ రాహుల్ తొలి ఇన్నింగ్స్లో సత్తా చాటాడు. 214 బంతుల్లో 84 పరుగులు చేశాడు. రెండో ఇన్నింగ్స్లో 26 పరుగులు చేసి పెవిలియన్ చేరాడు. జట్టులో టాప్ స్కోరర్గా నిలిచాడు. సుదీర్ఘ ఫార్మాట్కు చాలాకాలం దూరంగా ఉన్న అతడు రిజర్వ్ బెంచ్కే పరిమితమయ్యాడు. శుభ్మన్ గిల్, మయాంక్ అగర్వాల్ గాయాల కారణంగా దూరం కావడం రాహుల్కు కలిసొచ్చింది. చివరిసారిగా 2018లో ఇంగ్లాండ్పై శతకం చేసిన అతడు ఆ తర్వాత చెప్పుకోదగ్గ ఇన్నింగ్స్ ఆడలేదు.
బుమ్ బుమ్ బుమ్రా..
డబ్ల్యూటీసీ ఫైనల్లో కివీస్పై ఘోరంగా విఫలమైన బుమ్రా.. ఇంగ్లాండ్తో తొలి టెస్టులో సత్తా చాటాడు. తొలి ఇన్నింగ్స్లో 46 పరుగులకే 4 వికెట్లు తీసిన జస్ప్రీత్.. రెండో ఇన్నింగ్స్లో 5 వికెట్లతో మెరిశాడు. దీంతో తక్కువ కాలంలోనే అతని బౌలింగ్లో చాలా మార్పు వచ్చిందని అభిమానులు బుమ్రాను మెచ్చుకుంటున్నారు.
ఇదీ చదవండి: అందువల్లే నా ఆటలో మార్పు: బుమ్రా
జడేజా అర్ధ శతకం..
తొలి ఇన్నింగ్స్లో కెప్టెన్ కోహ్లీ, వైస్ కెప్టెన్ రహానె, వన్డౌన్ బ్యాట్స్మన్ పుజారా విఫలమైన చోట ఆల్రౌండర్ జడేజా తన మార్క్ చూపించాడు. బంతితో వికెట్లేమీ తీయకున్నా.. బ్యాట్తో సత్తా చాటాడు. అద్భుత హాఫ్ సెంచరీతో టీమ్ఇండియా ఆధిక్యం సంపాదించడానికి దోహదపడ్డాడు.
52 టెస్టుల్లో 200 వికెట్లతో పాటు 2000 పరుగులు చేసిన భారత ఆటగాడిగా జడేజా ఫీట్ సాధించాడు. ఈ జాబితాలో ఇయాన్ బోథమ్ తొలి స్థానంలో ఉన్నాడు. ఇయాన్ కేవలం 42 టెస్టుల్లోనే ఈ ఘనత వహించాడు. ఆ తర్వాతి స్థానాల్లో కపిల్ దేవ్(50), ఇమ్రాన్ ఖాన్(50), అశ్విన్(51) ఉన్నారు.
రూట్ సెంచరీ..
తొలి ఇన్నింగ్స్లో 183 పరుగులకే ఆలౌటైన ఇంగ్లాండ్, రెండో ఇన్నింగ్స్లో 303 పరుగులు చేసింది. ఈ రెండింటిలో ఆతిథ్య జట్టుకు అండగా నిలిచింది కెప్టెన్ జో రూట్. ఓ హాఫ్ సెంచరీ, సెంచరీ సాయంతో మొత్తంగా 173 రన్స్ సాధించాడు. రూట్ ఈ మాత్రమైన ఆడకుంటే ఇంగ్లాండ్ ఇంకాస్త తక్కువ పరుగులు చేసేది. ఆట ఫలితం నాలుగో రోజే తేలిపోయేది.
అండర్సన్ అదుర్స్..
ఇంగ్లాండ్ సీనియర్ బౌలర్ జేమ్స్ అండర్సన్ సరికొత్త రికార్డును తన ఖాతాలో వేసుకున్నాడు. సుదీర్ఘ ఫార్మాట్లో అత్యధిక వికెట్లు తీసిన మూడో బౌలర్గా నిలిచాడు. ఈ క్రమంలో భారత మాజీ బౌలర్ అనిల్ కుంబ్లేను (619 వికెట్లు) అధిగమించాడు. కేఎల్ రాహుల్ వికెట్ తీసి జిమ్మీ ఈ ఘనత సాధించాడు. ఈ ఫీట్ చేరుకోవడానికి అతడికి 163 టెస్టులు అవసరమయ్యాయి. ఈ జాబితాలో శ్రీలంక స్పిన్నర్ ముత్తయ్య మురళీధరన్ (800 వికెట్లు) అగ్రస్థానంలో నిలిచాడు. ఆసీస్ దిగ్గజ బౌలర్ షేన్ వార్న్ (708 వికెట్లు) తర్వాత స్థానంలో ఉన్నాడు.
రాబిన్సన్ 'ఐదు'..
కెరీర్లో రెండో టెస్టు ఆడుతున్న ఇంగ్లాండ్ యువ బౌలర్ రాబిన్సన్.. ఇండియాపై తొలి టెస్టులో 5 వికెట్లతో రాణించాడు. కివీస్పై ఆడిన తొలి టెస్టులోనే 7 వికెట్లు తీసిన రాబిన్సన్.. ఆ తర్వాత జాతి వివక్ష వ్యాఖ్యలతో జట్టుకు దూరమయ్యాడు. తర్వాత అతడిపై కనికరం చూపింది ఇంగ్లాండ్ క్రికెట్ బోర్డు. తిరిగి భారత్తో ఐదు టెస్టుల సిరీస్కు ఎంపిక చేసింది.
ఇదీ చదవండి: ఐసీసీ 'ప్లేయర్ ఆఫ్ ది మంత్' రేసులో వీరే..
