లీడ్స్ వేదికగా ఇంగ్లాండ్తో జరుగుతున్న మూడో టెస్టు తొలి ఇన్నింగ్స్లో పేలవ ప్రదర్శనతో టీమ్ఇండియా 78 పరుగులకే ఆలౌట్ అయ్యింది. ఆ తర్వాత బ్యాటింగ్కు దిగిన ఇంగ్లీష్ జట్టు.. రెండో రోజు ఆట ముగిసే సమయానికి 8 వికెట్లు కోల్పోయి 423 పరుగులు చేసింది. ఫలితంగా ప్రత్యర్థి జట్టు 345 పరుగుల ఆధిక్యంతో కొనసాగుతోంది. ఈ నేపథ్యంలో బాలీవుడ్ మెగాస్టార్ అమితాబ్ బచ్చన్ 2016లో చేసిన ఓ ట్వీట్ ఇప్పుడు వైరల్గా మారింది. ఆ ట్వీట్ను డిలీట్ చేయమని అభిమానులు అమితాబ్ను డిమాండ్ చేస్తున్నారు.
ఇదీ జరిగింది
2016 టీ20 ప్రపంచకప్‌ సందర్భంగా టీమ్ఇండియా ఆస్ట్రేలియాను ఓడించి సెమీ ఫైనల్‌కు చేరింది. ఆరోజు విరాట్‌ కోహ్లీ (82*; 51 బంతుల్లో 9x4, 2x6) మంచి ఇన్నింగ్స్ ఆడి మ్యాచ్‌ను గెలిపించాడు. దాంతో ఫ్లింటాఫ్‌.. కోహ్లీ బ్యాటింగ్‌ను ప్రశంసిస్తూ వివాదాస్పద వ్యాఖ్యలు చేశాడు. "అతడు ఇలాగే కొనసాగితే ఏదో ఒక రోజు జో రూట్‌లా అద్భుతమైన ఆటగాడిగా మారుతాడు. ఫైనల్లో ఇంగ్లాండ్ ఎవరితో తలపడుతుందో." అని ట్వీట్ చేశాడు. దానికి స్పందించిన అమితాబ్ "రూట్ ఎవరు?నాకు తెలియదు. అయినా టీమ్ఇండియా అతడిని కూకటివేళ్లతో పెకిలిస్తుంది" అని బదులిచ్చారు.
అయితే కొంతకాలంగా రూట్ సెంచరీలతో అద్భుత ప్రదర్శన చేస్తున్నాడు. 2021లో 1350కుపైగా పరుగులు చేశాడు. ప్రస్తుతం జరుగుతున్న ఇంగ్లాండ్ సిరీస్లోనూ ఇప్పటికే మూడు శతకాలు బాదాదు. ఈ సిరీస్ పూర్తయ్యేలోగా 500కు పైగా పరుగులు చేస్తాడని క్రీడావిశ్లేషకులు భావిస్తున్నారు. మరోవైపు కొంతకాలంగా కెప్టెన్ కోహ్లీ అంచనాలకు తగ్గట్లుగా ఆడలేకపోతున్నాడు. రెండేళ్లుగా ఒక్క సెంచరీ కూడా చేయలేదు. ఈ నేపథ్యంలోనే బిగ్బీ చేసిన సదరు ట్వీట్ను తొలగించాలంటూ నెటిజన్లు డిమాండ్ చేస్తున్నారు.
ఫ్లింటాప్ చురక
టీమ్‌ఇండియాపై తన వందో టెస్టులో రూట్ ద్విశతకం సాధించిన సందర్భంలోనూ ఫ్లింటాప్ తాను చేసిన ఆ పాత ట్వీట్ను వెలికి తీశాడు. అమితాబ్ పోస్టును రీట్వీట్‌ చేస్తూ "మీ మీద ఎంతో గౌరవం ఉంది. కానీ, ఈ ట్వీట్ ఇన్నేళ్ల తర్వాత పనికొచ్చింది" అని పేర్కొంటూ బిగ్బీకి చురకంటించాడు.
ఇదీ చూడండి: లార్డ్స్ మైదానంలో కోహ్లీ, రూట్ తీవ్ర వాగ్వాదం
