Irish regulators fine Instagram : టీనేజర్ల వ్యక్తిగత డేటాను దుర్వినియోగం చేసిన కేసులో ప్రముఖ సామాజిక మాధ్యమమైన ఇన్స్టాగ్రామ్పై ఐర్లాండ్ ప్రభుత్వం భారీ జరిమానా విధించింది. 405 మిలియన్ యూరోల (సుమారు రూ.3,500 కోట్లు) జరిమానా కట్టాలని ఆదేశించింది. ఈ విషయాన్ని ఐర్లాండ్ డేటా ప్రొటెక్షన్ కమిషన్ ఈ మెయిల్ ద్వారా తెలియజేసింది. ఈ నిర్ణయాన్ని గత వారమే తీసుకున్నప్పటికీ.. ప్రస్తుతం ఇందుకు సంబంధించిన వివరాలు వెల్లడించింది.
ఐరిష్ నియంత్రణ విచారణలో బయటపడ్డ సమాచారం ప్రకారం.. ఇన్స్టాగ్రామ్ 13 నుంచి 17 ఏళ్ల యువతకు సంబంధించిన ఈ మెయిల్, ఫోన్ నంబర్ లాంటి సమాచారన్ని ఇన్స్టాగ్రామ్ బహిర్గతం చేసింది. ఈ నేపథ్యంలో ఐరిష్ నిబంధనలు ఉల్లంఘించినందుకు ఆ సామాజిక మాధ్యమంపై 405 మిలియన్ల యూరోల జరిమానాను విధించింది. ఈ నిర్ణయంపై ఇన్స్టాగ్రామ్ పేరెంట్ కంపెనీ అయిన మెటా.. అప్పీలు చేసుకునే అవకాశం ఉంది. అయితే, దీనిపై మెటా ఇంకా స్పందించలేదు. గతేడాది అమెజాన్ సంస్థపైనా ఇలాంటి ఆరోపణలే వచ్చాయి. దీంతో విచారణ చేపట్టి ఆ సంస్థపై 746 మిలియన్ యూరోల జరిమానా విధించింది లగ్జెంబర్గ్ ప్రభుత్వం. ఆ తర్వాత ఓ సంస్థపై విధించిన అతిపెద్ద జరిమానా ఇదే కావడం గమనార్హం.
ఇదీ చదవండి: రిషి సునాక్ ఓటమి.. బ్రిటన్ నూతన ప్రధానిగా లిజ్ ట్రస్.. మోదీ ట్వీట్
