ఫొటో, ఫైల్, డ్యాకుమెంట్ లాంటివన్నింటినీ గూగుల్ క్లౌడ్ స్టోరేజీలో అప్లోడ్ చేసుకుంటాం. కానీ స్టోరేజీ సామర్థ్యం 15 జీబీ మాత్రమే ఉండడం వల్ల చాలా మంది ఇబ్బందులు పడుతుంటారు. డబ్బులు పెట్టి అప్గ్రేడ్ చేసుకోలేకపోతుంటారు. ఈ సమస్యను పరిష్కరించేలా వర్క్స్పేస్ వినియోగదారులకు గుడ్ న్యూస్ చెప్పింది గూగుల్. ప్రస్తుతం 15 జీబీగా ఉన్న వ్యక్తిగత క్లౌడ్ స్టోరేజీ సదుపాయాన్ని 1టీబీకి పెంచుతున్నట్లు ప్రకటించింది. దీనికోసం అకౌంట్ అప్గ్రేడ్ చేసుకోవాల్సిన అవసరం లేదని గూగుల్ తన బ్లాగ్స్పాట్లో పేర్కొంది.
వీటితో పాటు పీడీఎఫ్, క్యాడ్ లాంటి 100 రకాల ఫైల్స్ను డ్రైవ్లో స్టోర్ చేసుకునేలా అనుమతిచ్చింది. మైక్రోసాఫ్ట్ ఆఫీస్ ఫైల్స్ను కన్వర్ట్ చేయకుండానే ఎడిట్ చేసుకునే సదుపాయాన్ని తీసుకువచ్చింది. మాల్వేర్, స్పామ్, ర్యామ్సన్వేర్ లాంటి వైరస్ల నుంచి ఫైల్స్ను రక్షించేలా ఇన్బిల్ట్ వ్యవస్థను అందుబాటులోకి తీసుకురానుంది. ఏకకాలంలో అనేక మందికి మెయిల్ చేసే కొత్త అప్డేట్ను ప్రవేశపెట్టింది సంస్థ. దీంతో ఫార్వర్డ్ మెయిల్ కాకుండా ప్రతిఒక్కరికీ ప్రత్యేకంగా మెయిల్ చేసినట్లు ఉంటుంది. వీటిని అన్సబ్స్క్రైబ్ చేసే అవకాశాన్ని కల్పించింది.
మరోవైపు గూగుల్ వర్క్స్పేస్ సేవలను మరిన్ని దేశాలకు విస్తరించింది. ఈ జాబితాలో ఫిలిప్పీన్స్, వియత్నాం, ఇండోనేషియా, మలేసియా, తైవాన్, థాయిలాండ్, నెదర్లాండ్స్, పోర్చుగల్, బెల్జియం, ఫిన్లాండ్, గ్రీస్, అర్జెంటీనా దేశాలు ఉన్నాయి. జూమ్ రూమ్ నుంచి గూగుల్ మీట్లోకి సులువుగా కనెక్ట్ అయ్యేలా ఆ సంస్థతో ఒప్పందం చేసుకున్నామని.. త్వరలోనే అందుబాటులోకి తీసుకువస్తామని గూగుల్ చెప్పింది. వివిధ సంస్థలు తమ ఉద్యోగులతో సులభంగా సమావేశం నిర్వహించుకునేందుకే ఈ సదుపాయాన్ని తీసుకువస్తున్నామని పేర్కొంది.
ఇవీ చదవండి: రెండో 'మెదడు' కావాలా?.. ఎక్కడ దొరుకుతుందో తెలుసా?
