తెలంగాణ ఉమ్మడి ఖమ్మం జిల్లాలో గంజాయి సరఫరా రోజురోజుకి పెరుగుతోంది. ఇటీవల పోలీసుల తనిఖీల్లో చాలా కేసులు వెలుగుచూశాయి. గంజాయి ముఠాలు యువకులతో సరఫరా చేయిస్తున్నట్లు తేల్చారు. కొన్ని రోజుల క్రితం తెలంగాణ-ఏపీ సరిహద్దుల్లోని అశ్వారావుపేట వద్ద భారీగా గంజాయి పట్టుబడింది. దిల్లీకి చెందిన ఓ వ్యక్తిని పోలీసులు అరెస్ట్‌ చేశారు. నిందితుడు జైలు శిక్ష అనుభవిస్తున్న సమయంలో... ఖమ్మానికి చెందిన ఓ యువకుడిని పరిచయం చేసుకున్నాడు. బెయిల్‌ ఇప్పిస్తామని చెప్పి గంజాయి రవాణా ఊబిలోకి దించాడు. అక్రమంగా సరుకు తరలించే సమయంలో యువకుడు మరోసారి జైలు పాలయ్యాడు. అతడిని బయటకు తీసుకువచ్చే క్రమంలో యువకుడి సోదరుడు సైతం సరఫరాదారునిగా మారటం అధికారులను విస్మయానికి గురిచేసింది.
భద్రాచలం నుంచి అక్రమంగా
ఖమ్మం జిల్లాలోని రఘునాథపాలెంలో కొన్ని నెలల క్రితం అనుమానాస్పదంగా వెళుతున్న ఆటోను ఆబ్కారీ శాఖ అధికారులు తనిఖీలు చేశారు. భద్రాచలం నుంచి అక్రమంగా తరలిస్తున్న 2 క్వింటాళ్ల గంజాయి దొరకగా.... నలుగురు యువకులు పట్టుబడ్డారు. గంజాయి సరఫరా ఎందుకు చేస్తున్నారని పోలీసులు ప్రశ్నించగా..... చెప్పిన చోటుకి సరుకు చేరవేస్తే రూ.లక్ష ఇస్తామని మధ్యవర్తులు చెప్పడంతో డబ్బులకు ఆశపడినట్లు వెల్లడించారు.
జోరుగా రవాణా..
ఛత్తీస్‌గఢ్‌, ఒడిశాతోపాటు ఆంధ్రప్రదేశ్‌లోని విశాఖ మన్యం నుంచి గంజాయి రవాణా జోరుగా సాగుతోంది. అక్కడి నుంచి హైదరాబాద్, ముంబయి, దిల్లీకి చేర్చేందుకు యువకులను వాడుకుంటున్నారు. తరలించే ప్రదేశం, మొత్తం గంజాయి విలువను బట్టి యువకులకు డబ్బు చెల్లిస్తారు. పోలీసుల కళ్లుగప్పి సరుకు తరలిస్తే లక్షల్లో డబ్బు వస్తుండటంతో... యువకులు ఆకర్షితులవుతున్నట్లు అధికారులు తెలిపారు.
డిగ్రీలు, ఇంజినీరింగ్‌ చదివిన వారే..
ఖమ్మం జిల్లాలో గతేడాది 34 కేసుల్లో 72 మంది అరెస్టవ్వగా.... ఇందులో 60 మంది యువకులు ఉన్నారని అధికారులు తెలిపారు. భద్రాద్రి కొత్తగూడెం జిల్లాలో పరిస్థితి మరింత తీవ్రంగా ఉందని చెప్పారు. 2020లో 66 కేసుల్లో 206 మందిని అరెస్టు చేశారు. వీరిలో 170 మంది వరకు యువకులు ఉండగా... డిగ్రీలు, ఇంజినీరింగ్‌ చదివిన వారు ఎక్కువని గుర్తించారు. గ్రామీణ యువకులే లక్ష్యంగా దిల్లీకి చెందిన ముఠాలు పనిచేస్తున్నాయని వెల్లడించారు. యువత ఉచ్చులో చిక్కుకోకుండా అవగాహన కార్యక్రమాలు సైతం చేపట్టనట్లు వెల్లడించారు.
ఇవీ చూడండి: సిడ్నీ టెస్టు: లంచ్ బ్రేక్ సమయానికి ఆసీస్ 249/5
