దీపావళి పండగ వేళ టపాసులు కాలుస్తూ ఉన్న యువకులను తాగిన మైకంలో కానిస్టేబుల్ అసభ్య పదజాలంతో దూషించారు. పోలీసు మాట్లాడిన బూతుల వీడియో సామాజిక మాధ్యమాల్లో వైరల్ అవుతోంది. తెలంగాణలోని నాగర్ కర్నూల్ జిల్లా కేంద్రంలోని రామ్ నగర్ కాలనీలో రామాలయం దేవాలయం సమీపంలో కొందరు యువకులు దీపావళి సందర్భంగా పటాకులు కాలుస్తూ ఆనందంగా సంబురాలు జరుపుకుంటున్నారు. అంతలో పట్టణానికి చెందిన శివశంకర్ అనే కానిస్టేబుల్ తప్ప తాగి వచ్చి వీరంగం చేశారు. దుర్భాషలాడుతూ కానిస్టేబుల్ హల్ చల్ చేశారు.
ఫ్రెండ్లీ పోలీస్ అంటే ఇదేనా?
యువకులు, స్థానికులు ఆయనకి నచ్చజెప్పినా వినకుండా వారితో వాదించారు. 'ఏం చేసుకుంటారో చేసుకోండి, ఎవరితో చెప్పుకుంటారు చెప్పుకోండి... నన్ను ఎవరూ ఏమీ చేయలేరు' అని అసభ్య పదజాలంతో బూతులు మొదలు పెట్టారు. స్థానికంగా ఉన్న యువకులు కానిస్టేబుల్ తిట్ల పురాణాన్ని వీడియో తీసి వైరల్ చేశారు. ఫ్రెండ్లీ పోలీస్ అంటే ఇదేనా అని సామాజిక మాధ్యమాల్లో నెటిజన్లు ప్రశ్నిస్తున్నారు? కానిస్టేబుల్పై కఠిన చర్యలు తీసుకోవాలని స్థానికులు డిమాండ్ చేస్తున్నారు.
స్పందించిన ఎస్పీ
మద్యం మత్తులో వీరంగం సృష్టించిన కానిస్టేబుల్ వ్యవహారంపై జిల్లా ఎస్పీ సాయిశేఖర్ స్పందించారు. కానిస్టేబుల్ శివశంకర్‌ను ప్రధాన కార్యాలయానికి అటాచ్ చేసినట్లు ఆయన ప్రకటించారు.
