మీ ఉంగరం రెండు చేస్తానంటారు... కాజేస్తారు!

తెలంగాణలో వాణిజ్య కేంద్రంగా విలసిల్లిన సికింద్రాబాద్​లో ప్రజలకు మాయమాటలు చెప్పి బంగారం కాజేస్తోన్న ముఠాపై వరుస ఫిర్యాదులతో పోలీసులు అప్రమత్తమయ్యారు. సీసీ ఫుటేజీలను పరిశీలించి కొందరు వ్యక్తులను అరెస్టు చేశారు. కేసు నమోదు చేసి పూర్తి స్థాయిలో దర్యాప్తు చేస్తున్నారు.

మీరు ఆర్థిక సమస్యలతో బాధపడుతున్నారా... మీ కుటుంబంలో ఇబ్బందులున్నాయా... వ్యాపారంలో నష్టపోతున్నారా... మీ చేతికి ఉన్న బంగారు ఉంగరం నా చేతిలో ఉన్న గిన్నెలో వేయండి. దానిని రెండుగా చేసి మీ చేతిలో పెడతాను అంటూ బంగారం కాజేసే ముఠా తెలంగాణలోని సికింద్రాబాద్​లో సంచరిస్తోంది. ఈ మోసాలపై బాధితులు మహంకాళి పోలీసులకు ఫిర్యాదు చేశారు.

ప్రజలకు మాయమాటలు చెప్పి బంగారం కాజేస్తున్న ముఠాపై వరుస ఫిర్యాదులతో పోలీసులు అప్రమత్తమయ్యారు. దొంగల ఆచూకీని తెలుసుకునేందుకు సీసీ ఫుటేజీలను పరిశీలించారు. రెండ్రోజుల క్రితం కొందరు వ్యక్తులను చిలకలగూడ పోలీసులు అరెస్టు చేసి... మహంకాళి పోలీసులకు అప్పగించారు. నిందితుల్లో ఒకరు బాలుడున్నట్లు సమాచారం. వీరు తెలుపు రంగు బట్టలు ధరించి తిరుగుతున్నారని... ప్రజలు అప్రమత్తంగా ఉండాలని పోలీసులు సూచించారు.

ఇదీ చూడండి :కొడుకు మృతదేహం మోస్తూ 4 కి.మీ నడక