Omicron Death In UK: బ్రిటన్లో తొలి ఒమిక్రాన్ మరణం నమోదైంది. ఈ మేరకు బ్రిటన్ ప్రధాని బోరిస్ జాన్సన్ వెల్లడించారు.
బ్రిటన్లో తొలి మరణం నమోదుతో.. దేశ ప్రజలు అప్రమత్తమయ్యారు. బూస్టర్ డోసు తీసుకునేందుకు ప్రజలు వ్యాక్సినేషన్ సెంటర్ల వద్ద బారులు తీరారు. ఓ వ్యాక్సిన్ క్లినిక్కు వెళ్లిన బ్రిటన్ ప్రధాని జాన్సన్.. ప్రజలకు పలు సూచనలు చేశారు. ఒమిక్రాన్ వేరియంట్ వ్యాప్తి నేపథ్యంలో అప్రమత్తంగా ఉండాలని సూచించారు. ప్రజలందరికీ బూస్టర్ డోసులు అందించనున్నట్లు తెలిపారు.
పాక్లో తొలి ఒమిక్రాన్ కేసు..
పాకిస్థాన్లో తొలి ఒమిక్రాన్ కేసు నమోదైంది. జీనోమ్ సీక్వెన్సింగ్ పరీక్షల్లో ఒమిక్రాన్ నిర్ధరణ అయినట్లు ఇస్లామాబాద్లోని జాతీయ వైద్య విశ్వవిద్యాలయం తెలిపింది. కరాచీకి చెందిన 57ఏళ్ల మహిళకు ఒమిక్రాన్ సోకినట్లు వెల్లడించారు అధికారులు. ప్రజలు.. కొవిడ్ వేరియంట్ల బారిన పడకుండా ఉండాలంటే వ్యాక్సిన్ తీసుకోవాలన్నారు.
ఒమిక్రాన్ వేరియంట్ 63 దేశాలకు వ్యాపించిందని ప్రపంచ ఆరోగ్య సంస్థ(డబ్ల్యూహెచ్ఓ) ఇటీవల తెలిపింది. కరోనా రెండో దశలో విధ్వంసం సృష్టించిన డెల్టా వేరియంట్ను ఇది త్వరలోనే అధిగమించవచ్చని అంచనా వేసింది. కొత్త వేరియంట్ ఇంత వేగంగా ఎందుకు వ్యాప్తి చెందుతుందో ఇంకా తెలియదని డబ్ల్యూహెచ్ఓ తెలిపింది.
ఇప్పటివరకు ఉన్న ప్రాథమిక సమాచారం ప్రకారం డెల్టా కంటే ఈ వేరియంట్ తక్కువ ప్రమాదకారి అని అభిప్రాయపడింది డబ్ల్యూహెచ్ఓ. ఒమిక్రాన్పై వ్యాక్సిన్ల పనితీరుకు సంబంధించి సరైన సమాచారం లేదని తెలిపింది.
ఇదీ చూడండి: దక్షిణాఫ్రికా అధ్యక్షుడికి కరోనా- త్వరగా కోలుకోవాలని మోదీ ట్వీట్
