కరోనాను మరింత సమర్థంగా ఎదుర్కొనేందుకు రెండు వేర్వేరు టీకాలను కలిపే ప్రయోగాలపై ప్రపంచ దేశాలు తలమునకలయ్యాయి. ఈ నేపథ్యంలో ఆస్ట్రాజెనెకా, స్పుత్నిక్-వి టీకాల మిశ్రమం ఎలాంటి దుష్ప్రభావాలు చూపలేదని రష్యా సంస్థ రష్యన్ డైరెక్ట్ ఇన్వెస్ట్మెంట్ ఫండ్(ఆర్డీఐఎఫ్) ప్రకటించింది. ఈ మిశ్రమ టీకా తీసుకున్నవారిలో ఎటువంటి ప్రతికూలతలకు గురి కాలేదని.. అలాగే కరోనా బారిన పడకుండా సమర్థంగా పని చేస్తున్నట్లు తెలిపింది. ఆ రెండు టీకాల సమ్మేళనంపై నిర్వహించిన ట్రయల్స్లో ఈమేరకు వెల్లడైందని ఆర్డీఐఎఫ్ పేర్కొంది.
ఆక్స్ఫర్డ్ విశ్వవిద్యాలయం, ఆర్డీఐఎఫ్ సంయుక్తంగా అభివృద్ధి చేసిన ఈ మిశ్రమంపై ట్రయల్స్ నిర్వహించారు. కొవిడ్ను సమర్థంగా ఎదుర్కొనే టీకా అభివృద్ధిలో సహకారం లక్ష్యంగా ఆర్డీఐఎఫ్, ద గమలేయ సెంటర్, ఆస్ట్రాజెనెకా, ఆర్-ఫార్మ్ ఒప్పంద పత్రంపై గతంలో సంతకాలు చేశాయి. అనంతరం ఆస్ట్రాజెనెకా, స్పుత్నిక్-వి తొలి కాంపోనెంట్ మిశ్రమ టీకాపై 2021 ఫిబ్రవరిలో పరిశోధన ప్రారంభించాయి. ఇందులో భాగంగా 50 మంది వలంటీర్లపై ట్రయల్స్ నిర్వహించారు. ఈ డేటాను విశ్లేషించిన శాస్త్రవేత్తలు.. ఎలాంటి దుష్ప్రభావాలు చూపలేదని పేర్కొన్నారు.
"దీనిపై ప్రపంచ దేశాల్లో ప్రయోగాలు జరుగుతున్నాయి. యూఏఈలో వలంటీర్లకు టీకా అందిస్తున్నాం. రష్యా, బెలారస్ దేశాల్లో ట్రయల్స్కు అనుమతి పొందాం" అని పరిశోధకలు తెలిపారు. దీనికి సంబంధించి పూర్తి డేటాను ఈ ఆగస్టులో ప్రచురించనున్నట్లు వెల్లడించారు.
ఇదీ చూడండి: టీకా మిక్సింగ్‌తో లాభమా? నష్టమా?
