భీకర దాడులతో తాలిబన్ల(Afhgan Taliban) వెన్నులో వణుకు పుట్టించిన పంజ్షేర్ లోయ(Panjshir Valley) ఇప్పుడు నిశ్శబ్దంగా మారింది. మొన్నటి వరకు గర్జించిన అక్కడి తుపాకులు ఇప్పుడు మూగబోయాయి. శుక్రవారం నుంచి పంజ్షేర్లో ఒక్క తూటా కూడా పేలలేదు. అఫ్గాన్ను తమ అధీనంలోకి తెచ్చుకున్న తాలిబన్లతో నార్తర్న్ అలయన్స్ చర్చలు జరుపుతుండటమే ఇందుకు కారణం. పంజ్షేర్ నుంచి అందుతున్న సమాచారం ప్రకారం పర్వాన్ ప్రావిన్సు రాజధాని చారీకార్లో తాలిబన్లకు, నార్తర్న్ అలయెన్స్కు మధ్య రెండు రోజుల పాటు(బుధవారం, గురువారం) చర్చలు జరిగాయి.
ఈ భేటీలో మూడు గంటల పాటు చర్చించిన విషయాలను ఇరువర్గాల ప్రతినిధులు తమ అధినాయకత్వానికి తెలియజేశారు. అనంతరం అఫ్గాన్లో(Afghan Crisis) శాంతి నెలకొల్పే దిశగా మరోసారి చర్చలు జరపనున్నారు. అప్పటి వరకు తాలిబన్లు(Taliban News), నార్తర్న్ అలయెన్స్ ఒకరిపై మరొకరు దాడి చేసుకోవద్దని సమావేశంలో నిర్ణయించారు. ఈ మేరకు నార్తర్న్ అలయన్స్ ప్రతినిధి మహమ్మద్ ఆలం ఇజెద్యార్ టోలో న్యూస్కు తెలిపారు. పంజ్షేర్లో తాలిబన్లపై తిరుగుబాటుకు నాయకత్వం వహించిన అహ్మద్ మసూద్(Panjshir Valley Massoud)ఈ భేటీకి హాజరుకాలేదు.
కాల్పుల విరమణ
చారీకార్లో జరిగిన ఈ భేటీలో అఫ్గాన్ మాజీ మంత్రులు, మాజీ ఎంపీలు కూడా పాల్గొన్నట్లు మహ్మద్ ఆలం సన్నిహితుడు ఫహీం దాష్తీ తెలిపారు. కాల్పుల విరమణ మినహా ఈ సమావేశంలో మరే విషయంపై కచ్చితమైన ఏకాభిప్రాయానికి రాలేదని పేర్కొన్నారు. ఇది ముందుగానే ఊహించామన్నారు. అయితే ఈ చర్చల అజెండాపై మాత్రం స్పష్టత వచ్చిందన్నారు.
'ఈ సమావేశంలో పంజ్షేర్ భవిష్యత్తుపై చర్చించాలని తాలిబన్లు కోరారు. మసూద్ తరఫు ప్రతినిధులు మాత్రం అఫ్గాన్ భవిష్యత్ ప్రభుత్వం నిర్మాణం గురించి మాట్లాడాలని పట్టుబట్టారు. వచ్చే ప్రభుత్వం ఐక్యతా విధానాన్ని పాటించడమే గాక మహిళలకు, మైనారిటీలకు సమాన హక్కులు కల్పించాలని పంజ్షేర్ ప్రతినిధులు తేల్చి చెప్పారు' అని మహ్మద్ ఆలం టోలో న్యూస్కు వివరించారు.
అఫ్గాన్లో భవిష్యత్ ప్రభుత్వ పరిపాలనా విధాన నిర్మాణంపైనే మసూద్ ప్రతినిధులు ప్రధానంగా దృష్టి సారించినట్లు తెలుస్తోంది. అయితే రెండు వర్గాల డిమాండ్లకు చాలా వ్యత్యాసం ఉందని సమాచారం. అఫ్గాన్లో అధికారం పంచుకోవాలని మసూద్ ప్రతినిధులు డిమాండ్ చేయగా.. పంజ్షేర్ హోదా విషయంపై తాలిబన్లు పట్టుబట్టినట్లు సంబంధిత వర్గాలు తెలిపాయి. ఈ సందేశాన్ని ఇరు వర్గాలు తమ నాయకత్వం దృష్టికి తీసుకెళ్తాయని పేర్కొన్నాయి.
ఈ చర్చల పురోగతి కోసం తాము ఎదురు చూస్తున్నట్లు అహ్మద్ మసూద్ మీడియాకు తెలిపారు. తాము మాత్రం పూర్తి సైనిక సన్నద్ధతతో ఉన్నట్లు స్పష్టం చేశారు. పంజ్షేర్ లోయను ఎట్టి పరిస్థితుల్లోనూ తాలిబన్లకు సరెండర్ చేసే ప్రసక్తే లేదని తేల్చి చెప్పారు. కానీ చర్చలకు మాత్రం సిద్ధమని స్పష్టం చేశారు.
పంజ్షేర్ను చుట్టుముట్టాం..
అయితే తాలిబన్ల(Afghanistan Taliban) వాదన మాత్రం మరోలా ఉంది. పంజ్షేర్ లోయను తాము ఇప్పటికే చుట్టుముట్టామని, సమస్యను శాంతియుతంగా పరిష్కరించుకోవాలనే ఉద్దేశంతోనే చర్చలు జరుపుతున్నామని చెప్పారు. శత్రువు తమ గుప్పిట్లోనే ఉన్నారని తాలిబన్ల అధికార ప్రతినిధి జబీహుల్లా ముజాహిద్ పేర్కొన్నాడు.
హజరా నాయకుడు, పీపుల్స్ ఇస్లామిక్ యూనిటీ పార్టీ ఛైర్మన్ మహమ్మద్ మోహఖిక్ కూడా తమ మద్దతు మసూద్కు ఉంటుందని ప్రకటించారు. ఇరానీలు, సంప్రదాయ తెగలతో ఈయనకు సన్నిహిత సంబంధాలున్నాయి.
ఇదీ చూడండి: US Airstrike: అమెరికా ప్రతీకారం- ఐసిస్ స్థావరాలపై డ్రోన్ దాడులు!
