కరోనా నియంత్రణకు గూగుల్​ 'లొకేషన్​ డేటా' అస్త్రం

కరోనా వైరస్​ వ్యాప్తి నియంత్రణకు తనమంతు సాయం చేసేందుకు సిద్ధమైంది గూగుల్​. ఈ మేరకు ప్రపంచవ్యాప్తంగా తమ వినియోగదారుల లొకేషన్​ డేటాను పబ్లిష్​ చేసేందుకు నిర్ణయించుకుంది. శుక్రవారం నుంచి ప్రత్యేక వెబ్​సైట్లో ఈ సమాచారం అందుబాటులోకి రానుంది.

ప్రపంచవ్యాప్తంగా 131 దేశాల్లోని తమ వినియోగదారుల లొకేషన్​ డేటాను పబ్లిష్​ చేసేందుకు సిద్ధమైంది ప్రముఖ టెక్​ దిగ్గజం​ గూగుల్​. కరోనా వైరస్ వ్యాప్తిని అరికట్టేందుకు ప్రభుత్వాలు చేస్తున్న ప్రయత్నాల్లో తమ వంతు సాయంగా ఈ నిర్ణయం తీసుకుంది. ప్రత్యేక వైబ్​సైట్​లో శుక్రవారం నుంచి ఈ సమాచారాన్ని అందుబాటులో ఉంచుతామని స్పష్టం చేసింది. కరోనా నియంత్రణకు అనుసరించాలని కోరుతున్న సామాజిక దూరం ప్రభావాన్ని అంచనా వేసేందుకు ప్రభుత్వాలకు ఈ సమచారం ఉపయోగపడుతుందని సంస్థ బ్లాగ్​లో తెలిపింది గూగుల్​.

"కొవిడ్​-19ను ఎలా ఎదుర్కోవాలన్న నిర్ణయాలకు ఈ రిపోర్టులు ఉపయోగపడతాయని భావిస్తున్నాం. అయితే దీని ద్వారా వ్యక్తిగత సమాచారమైన కాంటాక్టులు, కదలికలు, లొకేషన్​ను బహిర్గతం చేయం."

- గూగుల్

చైనా, సింగపూర్​, ఇజ్రాయెల్ ప్రభుత్వాలు కరోనా వైరస్​ వ్యాప్తిని అరికట్టేలా.. ఇప్పటికే తమ దేశ పౌరులపై ఎలక్ట్రానిక్​ పర్యవేక్షణ చేయాలని ఆదేశించాయి. ఐరోపా, అమెరికాలోనూ స్మార్ట్​ఫోన్​ డేటా ద్వారా ట్రాక్​ పౌరులను ట్రాక్​ చేస్తున్నారు. వ్యక్తిగత సమాచారానికి అత్యంత ప్రాధాన్యతనిచ్చే జర్మనీ కూడా ఒక స్మార్ట్​ఫోన్ యాప్​ ద్వారా కరోనా కట్టడికి ప్రయత్నిస్తోంది.