ప్రపంచ దేశాలను గడగడలాడిస్తున్న కరోనాకు వ్యాక్సిన్ ఇప్పట్లో రావడం కష్టమేనని నిపుణులు అభిప్రాయపడుతున్నారు. కొవిడ్ను ఎదుర్కొనేందుకు సమర్థమైన టీకా... 2021 ఏడాది తర్వాతే సాధారణ ప్రజలకు అందుబాటులోకి రావచ్చని ఓ సర్వేలో తేలింది. ఈ మేరకు కెనడాకు చెందిన మెక్గిల్ విశ్వవిద్యాలయ పరిశోధకులు.. వ్యాక్సినాలజీలో 25ఏళ్ల అనుభవం ఉన్న అమెరికా, కెనడాకు చెందిన 28 మంది శాస్త్రవేత్తలపై జూన్ నెలలో సర్వే నిర్వహించారు.
'2021 ఏడాదికి ముందే ప్రజలకు వ్యాక్సిన్ అందుబాటులోకి తీసుకొస్తామని అమెరికా ప్రభుత్వ అధికారులు చెబుతున్నారు. అయితే ఇది ఆశించిన ఫలితాలు ఇవ్వకపోవచ్చు. వచ్చే ఏడాది చివరికి వ్యాక్సిన్ను ప్రజలకు అందుబాటులోకి తీసుకురావడం ఉత్తమం. ఈ ప్రక్రియ 2022 వరకు కూడా జరగవచ్చు' అని పరిశోధకుల్లో ఒకరైన మెక్గిల్ విశ్వవిద్యాలయం ప్రొఫెసర్ జోనాథన్ కిమ్మెల్మెన్ తెలిపారు. ఈ సర్వేకు సంబంధించిన విషయాలను 'జనరల్ ఇంటర్నల్ మెడిసిన్' అనే జర్నల్లో ప్రచురించారు.
సమర్థమైన వ్యాక్సిన్ అందుబాటులోకి రావాలంటే కొన్ని సమస్యలు ఎదురవుతాయన్నారు. 'టీకా ఆమోదం పొందిన తర్వాత, దానికి భద్రతాపరమైన హెచ్చరికలుంటే లేబుళ్లు కనిపించవచ్చు. తొలిసారిగా భారీఎత్తున చేసే క్షేత్రస్థాయి అధ్యయనం.. టీకా సమర్థతపై సానుకూలంగా నివేదించలేదు' అని నిపుణులు అభిప్రాయపడ్డారు.
ఇదీ చూడండి: కరోనా బారిన పడిన ప్రపంచ నేతలు వీరే..
