Alia Bhatt on deleting RRR posts: ఆర్ఆర్ఆర్ సినిమాలో పాత్ర విషయమై అసంతృప్తితో ఉన్నట్లు తనపై వస్తున్న వదంతులను ఆలియా భట్ కొట్టిపారేశారు. ఇలాంటి ఊహాగానాలను ప్రచారం చేయొద్దని స్పష్టం చేశారు. ఇన్స్టాలో ఆర్ఆర్ఆర్కు సంబంధించిన పలు పోస్టులు డిలీట్ చేసిన విషయంపై స్పందించారు ఆలియా. తన ఖాతాలో పోస్టులు చిందరవందరగా ఉండకుండా ఓ క్రమంలో ఉండేలా చూసేందుకు కొన్ని వీడియో పోస్టులను తొలగించానని చెప్పారు. తాను ఇదివరకు కూడా కొన్ని పోస్టులను డిలీట్ చేసిన సందర్భాలు ఉన్నాయని తెలిపారు.
"ఆర్ఆర్ఆర్ టీమ్పై అసంతృప్తితో ఆ చిత్రానికి సంబంధించిన పోస్టులను డిలీట్ చేశానని ఈ మధ్య వార్తలు వచ్చాయి. దీని గురించి నేను ఈరోజే తెలుసుకున్నా. 'ఇన్స్టాగ్రామ్ గ్రిడ్' కోసం చేసే ఈ చిన్న పనిని పెద్దదిగా చూపుతూ ఊహాగానాలు ప్రచారం చేయొద్దని అందరినీ కోరుతున్నా. ఆర్ఆర్ఆర్ సినిమాలో భాగమైనందుకు నేను అత్యంత కృతజ్ఞతతో ఉన్నా. రాజమౌళి దర్శకత్వంలో సీత పాత్రను పోషించడం పట్ల సంతోషంగా ఉన్నా. తారక్, చరణ్తో కలిసి పనిచేయడం సహా చిత్రానికి సంబంధించిన ప్రతి ఒక్క అంశాన్ని నేను ప్రేమిస్తున్నా."
-ఆలియా భట్
రాజమౌళి, ఆయన బృందంతో కలిసి ఏళ్ల పాటు చిత్ర నిర్మాణం కోసం కష్టపడ్డారని.. ఆ కారణం వల్లే తాను ఈ వివరణ ఇస్తున్నానని ఆలియా తెలిపారు. ఆర్ఆర్ఆర్ విషయంలో ఎలాంటి తప్పుడు వార్తలు ప్రచారం కాకూడదన్న ఉద్దేశంతో తాను ఈ పోస్టు పెట్టినట్లు స్పష్టం చేశారు.
తన సోషల్మీడియాలో ఖాతాలో 'ఆర్ఆర్ఆర్'కు సంబంధించిన కొన్ని పోస్ట్లను ఆలియా తొలిగించిందని, ఇన్స్టాలో జక్నన్నను అన్ఫాలో చేసిందని ఇటీవల వార్తలు వచ్చాయి. ఇన్స్టాగ్రామ్లో మంగళవారం ఉదయం ఆలియా.. రాజమౌళిని అన్ఫాలో చేశారని, ఆ సమయంలో ఆలియా ఫాలో అవుతున్న వారి సంఖ్య 472గా ఉందని.. అందులో రాజమౌళి పేరు కనపడలేదని నెటిజన్లు గుర్తించారు. కానీ ఈ ప్రచారం జోరుగా సాగిన తర్వాత ఆమె ఫాలో అవుతున్న వారి సంఖ్య 474కు చేరింది. అందులో జక్కన్న పేరు కూడా కనిపించింది. మరి ఆమె అన్ఫాలో చేసి ఆ తర్వాత ఫాలో అయిందా లేదా నెటిజన్లు సరిగ్గా చూసుకోకుండా తప్పుడు ప్రచారం చేశారా అనేది స్పష్టత లేదు. అయితే, ఇన్స్టాలో నటీనటులు తరచుగా గ్రిడ్ ఫొటోలు పోస్ట్ చేస్తుంటారు. ఒకే ఫొటోను 9 భాగాలుగా విభజించి.. తొమ్మిది పోస్టులు పెడుతుంటారు. అన్నీ వరుసలో ఉంటేనే.. గ్రిడ్ ఫొటో సరిగ్గా కనిపిస్తుంది. ఇందుకోసమే ఆలియా పలు వీడియో పోస్టులను తొలగించినట్లు.. తాజా వివరణను బట్టి అర్థమవుతోంది.
ఇదీ చదవండి: కంగన కొత్త చిత్రం.. యాక్టర్, డైరెక్టర్, ప్రొడ్యూసర్ అన్నీ తానై..
