హైదరాబాద్ పటాన్చెరు ఠాణా పరిధిలోని శాంతినగర్‌ కాలనీలో బాలకృష్ణ అనే వ్యక్తి కుటుంబంతో కలిసి నివాసముంటున్నాడు. బుధవారం రాత్రి బాలకృష్ణ ఇంటి తలుపునకు గడియపెట్టకుండా పడుకున్నారు. అదే సమయంలో అక్కడకు వచ్చిన దొంగలు తలుపులు తెరిచి ఉండటం గమనించారు. ఇద్దరు లోపలికి ప్రవేశించి ఆ ఇంట్లో కలియ తిరిగారు. కోటి ఆశలతో లోపలికి వచ్చిన వారికి 4 చరవాణులు తప్ప ఏవీ దొరకలేదు. దీంతో అవి తీసుకుని అక్కడనుంచి వెళ్లిపోయారు.
తెల్లవారాక ఇంట్లో చరవాణులు కన్పించకపోవడంతో బాలకృష్ణ సీసీ కెమెరాలు పరిశీలించారు. ఇద్దరు దొంగలు ఇంట్లో తిరుగుతున్నట్లు ఫుటేజీలో గుర్తించారు. వెంటనే దొంగిలించిన చరవాణికి ఫోన్ చేయగా ఓ అపరిచిత వ్యక్తి లేపాడు.
"మీ ఇంట్లో ఏదో బంగారం ఉంటాది అనుకుని లోపలికి వచ్చాము. బంగారం లేదు, డబ్బు దొరకలేదు. సరే ఎలాగూ వచ్చాము కదా అని అక్కడున్న ఫోన్లు తీసుకెళ్లాము. సరే జరిగిందేదో జరిగిపోయింది. నాకు బోర్ కొడుతుంది. నీ ఫోన్ పాస్వర్డ్ చెప్పు గేమ్ ఆడుకుంటా. ఛార్జింగ్ అయిపోయిన వెంటనే... పటాన్ చెరు తీసుకువచ్చి నీ ఫోన్ నీకు ఇచ్చేస్తా'' అనే సమాధానం రావడంతో బాధితుడు అవాక్కయ్యాడు.
చేసేదేమి లేక ఆన్లైన్లో పోలీసులకు ఫిర్యాదు చేశాడు.
ఇదీ చూడండి: varalakshmi vratam: సౌభాగ్యం, సిరిసంపదలిచ్చే శ్రావణలక్ష్మి
