Hyderabad Pub Case: హైదరాబాద్ పుడింగ్ అండ్‌ మింక్‌ పబ్ కేసులో ఇద్దరు నిందితులను పోలీసులు కస్టడీలోకి తీసుకున్నారు. చంచల్ గూడ జైల్లో రిమాండ్ ఖైదీలుగా ఉన్న అనిల్, అభిషేక్లను పోలీసులు కస్టడీలోకి తీసుకొని ఉస్మానియా ఆస్పత్రిలో వైద్య పరీక్షలు చేయించారు. అనంతరం బంజారాహిల్స్ పీఎస్కు తరలించారు. నేటి నుంచి 4 రోజుల పాటు ఇద్దరినీ పోలీసులు ప్రశ్నించనున్నారు. ఈ కేసులో ఇప్పటికే బంజారాహిల్స్ పోలీసులు పలు ఆధారాలు సేకరించారు. అభిషేక్, అనిల్ చరవాణిలను విశ్లేషించిన బంజారాహిల్స్ పోలీసులు... వీళ్లిద్దరికీ మాదక ద్రవ్యాల విక్రేతలతో సంబంధాలున్నట్లు అనుమానిస్తున్నారు. ఈ మేరకు ఇద్దరి చరవాణిల్లోనూ పలువురు మాదకద్రవ్యాల విక్రేతల నెంబర్లు ఉండటాన్ని గుర్తించారు. గోవా, ముంబయి నుంచి కొకైన్ తీసుకొచ్చి పబ్లో విక్రయిస్తున్నట్లు పోలీసులు అనుమానిస్తున్నారు.
ఎవరెవరికి కొకైన్ విక్రయించారనే కోణంలో పోలీసులు అభిషేక్, అనిల్ను ప్రశ్నించనున్నారు. 3వ తేదీ తెల్లవారుజాము పబ్పై దాడి చేసిన పోలీసులు 148 మందిని అదుపులోకి తీసుకొని సొంత పూచీకత్తుపై పంపించారు. పబ్ లో 4.6 గ్రాముల కొకైన్ స్వాధీనం చేసుకున్నారు. ఈ కొకైన్ ఎవరెవరికి సరఫరా చేయడానికి తీసుకొచ్చారనే వివరాలను పోలీసులు సేకరిస్తున్నారు. పుడింగ్ పబ్ కేసులో నెల రోజుల వ్యవధిలోనే మూడు పార్టీలు జరిగినట్లు పోలీసుల దర్యాప్తులో తేలింది. ఈ మూడు పార్టీల్లోనూ తరచూ పబ్కు వచ్చే వ్యక్తులే పాల్గొన్నట్లు పోలీసులు గుర్తించారు. ఆ పార్టీల్లోనూ కొకైన్ సరఫరా జరిగిండొచ్చని అనుమానాలు వ్యక్తం అవుతున్నాయి. పబ్పై దాడి జరిగిన రోజు మూడు నాలుగు గంటల వ్యవధిలో అభిషేక్ - అనిల్ మధ్య 15 సార్లు ఫోన్ సంభాషణలు జరిగినట్లు పోలీసులు గుర్తించారు. ఇన్నిసార్లు ఇద్దరూ కలిసి ఏం మాట్లాడారనే వివరాలను పోలీసులు సేకరిస్తున్నారు.
ఇవీ చూడండి:
