Gold Cheating: బంగారాన్ని మెరుగుపెడతామని వచ్చి ఓ మహిళను నిలువెత్తున ముంచేందుకు యత్నించారు ఇద్దరు దుండగులు. నల్లగా ఉన్న బంగారాన్ని రసాయనంలో ముంచి తళతళలాడేలా చేస్తామని మాయమాటలు చెప్పి మోసం చేసేందుకు ప్రయత్నించిన నిందితులను స్థానికులు పట్టుకున్నారు.
సంగారెడ్డి జిల్లా పటాన్చెరులోని లక్కదొడ్డి కాలనీకి చెందిన సుకన్య అనే మహిళ ఇంటికి బిహార్కు చెందిన ఆనంద్కుమార్ సాహా, రాజ్కుమార్ సాహాలు వచ్చారు. బంగారు పుస్తెలతాడు శుభ్రం చేసి ఇస్తామని చెప్పి తీసుకున్నారు. వారి వెంట తెచ్చుకున్న కొన్ని రసాయనాల్లో ఈ పుస్తెలతాడును శుభ్రం చేస్తున్నామని వాటిలో ముంచారు. ఆ రసాయనంలో ముంచడంతో మూడు తులాలు గల పుస్తెల తాడు రెండు తులాలు కరిగిపోయి ఒక తులమే మిగిలింది. పుస్తెలతాడు తెగిపోయే విధంగా మారింది.
ఈ నేపథ్యంలో సుకన్యకు అనుమానం వచ్చింది. ఆ ఇద్దరిని నిలదీసేలోపే వారు పరారయ్యేందుకు ప్రయత్నించారు. సుకన్య గట్టిగా అరవడంతో చుట్టుపక్కల వారు వచ్చి ఆ ఇద్దరిని పట్టుకున్నారు. వారిద్దరిని పటాన్చెరు పోలీస్స్టేషన్లో అప్పగించారు. వీరిపై కేసు నమోదు చేసి దర్యాప్తు చేస్తున్నట్లు నేరవిభాగం సీఐ శ్రీనివాస్ తెలిపారు.
ప్రజలు అప్రమత్తంగా ఉండాలి..
లక్కదొడ్డి ప్రాంతంలో ఇద్దరు వ్యక్తులు ఆనంద్కుమార్ సాహా, రాజ్కుమార్ సాహాలు బంగారు ఆభరణాలను మెరుగుపెడతామని సుకన్య అనే మహిళ ఇంటికి వెళ్లారు. ఆమె తన పుస్తెలతాడు శుభ్రం చేయమని ఇచ్చింది. వారు పుస్తెలతాడును రసాయనంలో వేయగానే కరిగి తెగే స్థితికి వచ్చింది. ఆమెకు అనుమానం వచ్చి భర్తకు, చుట్టుపక్కల వారికి ఫోన్ చేసి తెలపగా వారు నిందితులను పట్టుకుని పీఎస్కు తీసుకొచ్చారు. సుకన్య ఫిర్యాదు మేరకు కేసు నమోదు చేసుకుని దర్యాప్తు చేస్తున్నాం. కొత్త వారు ఎవరైనా వచ్చి ఇలా అడిగితే అప్రమత్తంగా ఉండాలి. ఏదైనా అనుమానం వస్తే పోలీసులను సంప్రదించాలి. -శ్రీనివాస్, పటాన్చెరు సీఐ
ఇదీ చదవండి:
