Case On Bellamkonda: సినీ నిర్మాత బెల్లంకొండ సురేష్, ఆయన కొడుకు హీరో బెల్లంకొండ శ్రీనివాస్పై తెలంగాణలోని బంజారాహిల్స్ సీసీఎస్లో కేసు నమోదైంది. బెల్లంకొండ సురేష్, శ్రీనివాస్ తన దగ్గర డబ్బులు తీసుకుని తిరిగి ఇవ్వటం లేదని శ్రవణ్కుమార్ అనే వ్యాపారి నాంపల్లి కోర్టును ఆశ్రయించారు. కోర్టు ఇచ్చిన ఆదేశాల మేరకు పోలీసులు ఇరువురిపై కేసు నమోదు చేశారు.
2018లో డైరెక్టర్ మలినేని గోపిచంద్ దర్శకత్వంలో తీస్తున్న సినిమాకు డబ్బులు అవసరముందని దాదాపు రూ.85 లక్షలు తీసుకున్నారని శ్రవణ్ తెలిపారు. తీసుకున్న డబ్బులు అప్పటి నుంచి తిరిగి ఇవ్వలేదన్నాడు. ఇవ్వమని అడిగితే.. ఆ సినిమాకు సహనిర్మాతగా లాభాల్లో వాటా కల్పిస్తామని నమ్మబలికారన్నారు. ఇప్పటికీ ఆ సినిమా తెరకెక్కకపోవటం.. డబ్బులు కూడా తిరిగి ఇవ్వకపోవటం వల్ల నాంపల్లి కోర్టులో శ్రవణ్ దావా వేశాడు. బాధితుని పిటిషన్ను పరిశీలించిన కోర్టు.. బెల్లంకొండ సురేష్, శ్రీనివాస్పై కేసు నమోదు చేయాలని హైదరాబాద్ సీసీఎస్ పోలీసులను ఆదేశించింది. కోర్టు ఆదేశాలమ మేరకు.. పలు సెక్షన్ల కింద ఇరువురిపై కేసు నమోదు చేశారు.
ప్రస్తుతం.. బెల్లకొండ శ్రీనివాస్ హీరోగా.. ఛత్రపతి సినిమానులో బాలీవుడ్లో రీమేక్ చేస్తున్నారు. ఈ చిత్రానికి టాలీవుడ్ డైరెక్టర్ వివి వినాయక్ దర్శకత్వం వహిస్తుండగా.. పెన్ స్టూడియోస్ నిర్మిస్తోంది. దీంతో పాటు.. టైగర్ నాగేశ్వరరావు ఆత్మకథ ఆధారంగా తెరకెక్కిస్తోన్న 'స్టువర్టుపురం దొంగ' సినిమాలోనూ ప్రధాన పాత్ర పోషిస్తున్నారు. ఈ చిత్రాన్ని బెల్లకొండ సురేష్ నిర్మిస్తున్నారు.
ఇదీ చూడండి: 'స్టూవర్ట్పురం దొంగ'గా బెల్లంకొండ శ్రీనివాస్
