హైదరాబాద్ అంబర్పేటలో ఓ విశ్రాంత పోలీస్ నివాసముంటున్నారు. ఆయనకు ఓ చురుకైన మనవడు(కుమార్తె కుమారుడు) ఉన్నాడు. అందరు తాతల్లాగే.. మనుమడిపై విపరీతమైన ప్రేమ. బుడ్డోడు అడిగిందేది కాదనకుండా.. ఇస్తుంటాడు. "తాత మొబైల్ ఇయ్యవా.. గేమ్ ఆడుకుంటా..." అని క్యూట్ వాయిస్తో స్వీట్గా అడిగితే.. ఏ తాత ఇవ్వనంటాడు. అందరి తాతల్లాగే.. మనవడు అడిగిన వెంటనే మొబైల్ తీసి చేతిలో పెట్టేశాడు. ఇంకేముంది.. మన చిచ్చరపిడుగు తన పని మొదలుపెట్టేశాడు.
బాలునికి గేమ్స్ ఆడటం ఇష్టం ఉండటంతో.. నచ్చిన గేమ్ డౌన్లోడ్ చేసుకోవటం.. ఆడుకోవటం అలవాటే. అందులో భాగంగానే.. ఓ రోజు ఫ్రీఫైర్ గేమ్ను డౌన్లోడ్ చేసి ఆడటం మొదలుపెట్టాడు. సదరు గేమ్లో కొన్నిసార్లు.. ఆయా స్టేజ్లు దాటాలన్నా, ఆయుధాలు కావాలన్నా.. డబ్బులు చెల్లించాల్సి ఉంటుంది. ఆ సందర్భం మన బాలునికి తొందరగానే వచ్చింది. మొదటిసారి 1500 రూపాయలు పెట్టి గేమ్ ఆడాడు. అయితే.. మొబైల్లో డిజిటల్ పేమెంట్ యాప్స్తో పాటు నెట్బ్యాంకింగ్ను తాత రెగ్యులర్గా వాడుతుండటం వల్ల మన గేమింగ్ స్టార్కు పెద్దగా కష్టమేమి కలగలేదు. పేమెంట్ ప్రక్రియ సులభంగానే జరిగిపోయింది.
గేమ్లోని స్టేజ్లు తొందరతొందరగా దాటాలన్న ఆత్రుతతో పిల్లాడు.. తరచూ పేమెంట్లు చేస్తున్నాడు. ఇలా.. 10 వేల చొప్పున 60 సార్లు నగదు పెట్టి గేమ్ ఆడాడు. ప్రతీసారి డబ్బు చెల్లించి ఆడుతుండటంతో గేమింగ్ సిబ్బంది.. మొబైల్లోని అకౌంట్పై కన్నేశారు. చరవాణిలో నెట్ బ్యాంకింగ్ ఉండటం వాళ్లకు కలిసొచ్చే అంశం కావటం వల్ల.. 10 వేలు కాకుండా ఈసారి పెద్ద మొత్తానికే టెండర్ వేశారు. 2 లక్షలు, లక్ష 95వేలు, లక్ష 60వేలు, లక్ష 45 వేలు, లక్ష 25 వేలు, 50 వేలు చొప్పున వేర్వేరు సందర్భాల్లో నగదు స్వాహా చేశారు. ఇలా.. మొత్తం కలిపి తాత అకౌంట్ నుంచి ఏకంగా 44 లక్షలు మాయమయ్యాయి.
ఇదిలా ఉంటే.. ఏదో అవసరం పడి నగదు డ్రా చేద్దామని సదరు తాత బ్యాంకుకు వెళ్లాడు. నగదులో నిండుగా ఉండాల్సిన అకౌంట్.. నిల్ అని చూపించటంతో అవాక్కవటం తాత వంతైంది. ఆ షాక్ నుంచి తేరుకుని విషయంపై ఆరా తీయగా.. బ్యాంకు సిబ్బంది నగదు వివరాలను ఆయనకు అందించగా... అసలు విషయం అవగతమైంది. ఆ షాక్ నుంచి తేరుకుని.. వెంటనే కుటుంబసభ్యులు సైబర్ క్రైం పోలీసులను ఆశ్రయించారు. కేసు నమోదు చేసుకున్న పోలీసులు.. దర్యాప్తు చేస్తున్నారు.
జెట్ స్పీడ్తో మారిపోతున్న ప్రపంచానికి తగినట్టు.. పిల్లలు అలవాట్లు ఉండటం ఓవైపు ఆనందం, మరోవైపు ఆశ్చర్యం కలిగిస్తున్నా.. ఇలాంటి ఘటనలు జరిగినప్పుడు మాత్రం భయపడాల్సి వస్తోంది. మొబైల్స్ని ఒంటి చేత్తో ఆటాడుకోవటం చూసి గొప్పలు చెప్పుకోవాలో.. దానికి బానిసై మిగతా వాటిని నిర్లక్ష్యం చేయడాన్ని చూసి బాధపడాలో తెలియని అయోమయంలో తల్లిదండ్రులు తలలుపట్టుకుంటున్నారు. పిల్లలు చురుకుగా ఉండటం ఒకింత సంతోషించదగ్గ విషయమే అయినప్పటికీ.. తల్లిదండ్రులు వాళ్లపై ఎప్పటికప్పుడు ఓ కన్నేసి ఉంచాలన్నది నిపుణుల సూచన. ఇలాంటిదేదో జరగక ముందే.. జాగ్రత్త పడటం మంచిదేగా మరి..!
ఇవీ చూడండి:
