విశాఖ పరవాడ ఫార్మాసిటీలో సోమవారం రాత్రి జరిగిన అగ్ని ప్రమాదంలో ఒకరు మృతి చెందారు. మరొకరు తీవ్రంగా గాయపడ్డారు. ఈ ప్రమాదానికి ప్రభుత్వ నిర్లక్ష్యం, అధికారుల అలసత్వమే కారణమని రాజకీయ నేతలు ఆరోపించారు. ప్రమాద ప్రాంతాన్ని పరిశీలించేందుకు ప్రయత్నించిన ప్రతిపక్ష నేతలను పోలీసులు అదుపులోకి తీసుకున్నారు. తెదేపా నేత బండారు సత్యనారాయణమూర్తి, సీపీఐ రాష్ట్ర సహాయ కార్యదర్శి జేవీ సత్యనారాయణమూర్తి, జనసేన, భాజపా నేతలను పరిశ్రమ సమీపంలోకి వెళ్లకుండా పోలీసులు అదుపులోకి తీసుకుని, సమీప పోలీసు స్టేషన్ కు తరిలించారు.
ఎవరిది బాధ్యత?
ప్రమాదం జరిగిన తీరును ఇంతవరకూ ఏ అధికారి వివరాలు చెప్పలేదని ప్రతిపక్షనేతలు ఆరోపించారు. ప్రమాదంలో మరణించిన సీనియర్ కెమిస్ట్ గురించి కనీస సమాచారం ఇవ్వకపోవడాన్ని రాజకీయ పక్ష నేతలు తప్పుబట్టారు. ఎవరు బాధ్యత వహిస్తారని ప్రశ్నించారు.
అరెస్టులు
విశాఖ పరవాడ రాంకీ ఫార్మా కంపెనీ ప్రమాదంలో ప్రాణాలు కోల్పోయిన కెమిస్ట్ కాండ్రేగుల శ్రీనివాస్ మృతదేహాన్ని కేజీహెచ్ మార్చురీలో ఉంచారు. మృతదేహాన్ని చూసేందుకు కేజీహెచ్ కు వచ్చిన సీపీఎం, సీఐటీయూ నాయకులను పోలీసులు అరెస్ట్ చేశారు. బాధిత కుటుంబ సభ్యులను కలిసేందుకు వచ్చిన తమను అక్రమంగా అరెస్టు చేశారని సీపీఎం నేత సి.హెచ్. నరసింగరావు, సీఐటీయూ నాయకుడు వి.వి.శ్రీనివాసరావులు ఆరోపించారు.
ఇదీ చదవండి : 'కుయ్, కుయ్ కాదు... కుయ్యో, మొర్రో అంటున్నాయ్'
