కరోనా ఎఫెక్ట్ : చిన్న పరిశ్రమల చింతలు తీరేదెప్పుడు..?

కరోనా మహమ్మారి పారిశ్రామిక రంగానికి తీవ్రంగా దెబ్బతీసింది. కేంద్ర, రాష్ట్ర ప్రభుత్వాలు ప్రకటించిన రాయితీలు కొంత వెసులుబాటు కల్పించినా.. చిన్న, సూక్ష్మ, మధ్య తరహా పరిశ్రమలు కోలుకోడానికి కనీసం రెండు, మూడేళ్లు పట్టే అవకాశం ఉందని నిర్వాహకులు అంటున్నారు. బ్యాంకుల నుంచి నేరుగా నగదు వచ్చే మార్గం లేదని, కట్టాల్సిన వాయిదాలకు సర్దుబాటు చేయడం వల్ల పరిశ్రమలు ఎలా కోలుకుంటాయని ప్రశ్నిస్తున్నారు.

సాగరతీర నగరమైన విశాఖలో ఉన్న భారీ పరిశ్రమలు ఆర్థిక వ్యవస్ధలో కీలక పాత్ర పోషిస్తున్నాయి. విశాఖ ఉక్కు కర్మాగారం, బీహెచ్​ఈఎల్, హిందుస్థాన్ షిప్ యార్డు, నేవల్ డాక్ యార్డు, హెచ్​పీసీఎల్ పరిశ్రమలు పెద్ద ఎత్తున ఉపాధి కల్పిస్తున్నాయి. ఇవన్నీ కేంద్ర ప్రభుత్వ సంస్థలు కావడంతో లాక్​డౌన్ ఒత్తిడిని తట్టుకోగలిగే పరిస్థితి ఉన్నప్పటికీ వీటికి అనుబంధంగా పనిచేస్తున్న సూక్ష్మ, చిన్న, మధ్య తరహా పరిశ్రమలు మాత్రం నష్టాల్లో కూరుకుపోతున్నాయి.

ఉత్పత్తి యధాతథస్థితి ఎప్పుడోస్తుందో అని పరిశ్రమ వర్గాలు మల్లగుల్లాలు పడుతున్నాయి. కేంద్రం ప్రకటించిన ప్యాకేజీ వల్ల ఎంత వరకూ ఉపశమనం కలుగుతుందో స్పష్టత లేదని పారిశ్రామికవేత్తలు అంటున్నారు. గతంలో వందశాతం కార్మికులతో చేసే పనులను ఇప్పుడు కేవలం 30 నుంచి 40 శాతం మందితో చేయాల్సి వస్తోందని అంటున్నారు. పలు రిటర్న్​లు దాఖలు చేయాల్సిరావడం కూడా ఒక ప్రధాన సమస్యగా మారిందని చెబుతున్నారు.

తక్కువ వడ్డీకి రుణాలు కల్పించాలని నిర్ణయించినా.. అందుబాటులోకి రాలేదని తెలిపారు. దీంతో కార్మికుల జీతభత్యాలను చెల్లించడం, ఇతరత్రా నగదు అవసరాలు తీరే మార్గంలేదంటున్నారు.

వ్యవసాయ రంగంతో సమానంగా సూక్ష్మ, చిన్న, మధ్య తరహా పరిశ్రమలు ఉపాధి కల్పిస్తున్నాయని పారిశ్రామిక వేత్తలు అంటున్నారు. పరిశ్రమలను ఆదుకునేందుకు ప్రభుత్వం మరిన్ని చర్యలు చేపట్టాలని కోరుతున్నారు.

ఇదీ చదవండి : జోరందుకున్న ఆటోమొబైల్ అమ్మకాలు