వైకాపాది క్విడ్​-ప్రో-కో పారిశ్రామిక విధానం!

వైకాపా ప్రభుత్వానిది క్విడ్ ప్రో కో పారిశ్రామిక విధానమని తెలుగుదేశం అధినేత చంద్రబాబు మండిపడ్డారు. పారిశ్రామిక రంగంపై ప్రభుత్వం విడుదల చేసిన శ్వేతపత్రంలో తమ హయాంలో సమాచారం తప్ప కొత్త విషయం ‍ఒకటి లేదని తెదేపా నేతలు విమర్శించారు.

తెదేపా పారిశ్రామిక విధానం పారదర్శకంగా లేదని మంత్రి పేర్కొనడం అబద్ధమని తెదేపా నేతలు మండిపడ్డారు. పార్టీ రాష్ట్ర కార్యాలయంలో చంద్రబాబు అధ్యక్షతన ముఖ్యనేతలతో జరిగిన సమావేశంలో పారిశ్రామిక రంగానికి సంబంధించి మంత్రి గౌతంరెడ్డి విడుదల చేసిన శ్వేతపత్రంపై చర్చ జరిగింది. వైకాపా నేతలు రాష్ట్రానికి పెట్టుబడులు రాకుండా చేసి భవిష్యత్​ తరాలకు తీవ్ర నష్టం చేకూరుస్తున్నారని నేతలు మండిపడ్డారు. అవినీతి రహిత ఒప్పందాలు చేయడం తమ ప్రభుత్వ విధానమైతే..క్విడ్ ప్రో కో వైకాపా విధానమని విమర్శించారు.

అన్నీ రివర్సే!
కియా కార్ల తయారీ పరిశ్రమ తమ రాష్ట్రానికి వస్తే దాని అనుబంధ సంస్థల కంపెనీలను బయటకు పంపడమే వైకాపా లక్ష్యమని తెదేపా నేతలు ఆక్షేపించారు. వైకాపా నేతలకు అత్యంత ప్రియమైన పదం రివర్స్ అని ఎద్దేవ చేశారు. టెండర్లు, పరిపాలన, పెట్టుబడులు, పారిశ్రామికీకరణలలోనూ రివర్సేనాని విమర్శించారు. సులభతర వాణిజ్యంలో నెంబర్ వన్ రాష్ట్రాన్ని రివర్స్ చేస్తారని ఆగ్రహం వ్యక్తం చేశారు.

ఆ జాబితా ఇస్తే వెతుక్కుంటాం!

పారిశ్రామిక రంగంపై 47పేజీల శ్వేతపత్రంలో గత ప్రభుత్వ హయాంలో అవినీతి జరిగిందని ఎక్కడా చెప్పలేకపోవడం తమ పారదర్శకతకు నిదర్శనమని తెదేపా నేతలు అన్నారు. ఈ రెండు నెలల్లోనే 31 పారిశ్రామిక పార్కులు అభివృద్ధి చేసినట్లు శ్వేతపత్రంలో పేర్కొన్నారని...ఆ జాబితా ఇస్తే వెతుక్కుంటూ వెళ్తామని ఎద్దేవ చేశారు. తెదేపా హయాంలో పరిశ్రమల ఏర్పాటుకు చేసుకున్న ఒ‍ప్పందాలను 42శాతం, పెట్టుబడుల ఒప్పందాల్లో 47శాతం అమలులోకి వచ్చాయని స్పష్టం చేశారు. కర్ణాటక, మహారాష్ట్రలోనూ ఇది 15-20శాతానికి మించి లేదని వెల్లడించారు.

ఇదీ చదవండి: ఫర్నీచర్​ వ్యవహారం... అసెంబ్లీ చీఫ్​ మార్షల్​పై వేటు