ప్లాస్మా థెరపీకి సంబంధించి... నిర్దిష్టమైన కార్యాచరణ రూపొందించి అమలు చేస్తామని డీజీపీ గౌతంసవాంగ్‌ స్పష్టం చేశారు. డీజీపీ కార్యాలయంలో పోలీసుశాఖ, అపోలో ఆసుపత్రి సంయుక్తంగా నిర్వహించిన కొవిడ్‌-19 కార్యశాలకు గౌతంసవాంగ్‌ ముఖ్య అతిథిగా హాజరయ్యారు. కరోనా వ్యాప్తి నియంత్రణ కార్యక్రమాల్లో పోలీసులు ముందుండి విపత్కర కాలంలో సేవలందిస్తున్నారని... లాక్‌డౌన్‌ అమలు సమయంలో 45 మంది పోలీసులు విధి నిర్వహణలో ఉంటూ కరోనా బారినపడ్డారని డీజీపీ తెలిపారు.
అన్‌లాక్‌ 1, 2, 3 అమల్లోకి వచ్చిన తర్వాత 3,200 మంది సిబ్బంది కరోనా బారిన పడ్డారని వెల్లడించారు. 1,893 మంది కరోనా నుంచి కోలుకున్నారని... ఇందులో చాలామంది తిరిగి విధులకు హాజరుకావడం సంతోషించాల్సిన విషయమని డీజీపీ అన్నారు. అపోలో ఆసుపత్రి సహకారంతో సిబ్బందిలో అవగాహనకు- వైద్యపరమైన సలహాలకు వారి సేవలు తీసుకుంటామన్నారు. స్వచ్ఛందంగా తమకు సహకరించేందుకు ముందుకొచ్చిన అపోలో యాజమాన్యాన్ని డీజీపీ అభినందించారు.
ఇదీ చదవండి: కరోనాతో మాజీ మంత్రి పి.మాణిక్యాలరావు కన్నుమూత
