జగన్ అక్రమాస్తుల కేసుల్లో ఏ2గా ఉన్న ఎంపీ విజయసాయిరెడ్డి బెయిల్ రద్దు కోరుతూ.. ఎంపీ రఘురామకృష్ణరాజు సీబీఐ కోర్టులో పిటిషన్ దాఖలు చేశారు. కోర్టు విధించిన షరతులు ఉల్లంఘించినందున..బెయిల్ రద్దు చేయాలని కోరారు. వైకాపా ప్రభుత్వంలో కీలకపాత్రలో ఉన్న విజయసాయిరెడ్డి..సాక్షులను ప్రత్యక్షంగా, పరోక్షంగా బెదిరిస్తున్నారని వ్యాజ్యంలో రఘురామ ఆరోపించారు.
ఓ ఎంపీగా కేంద్ర హోం,ఆర్థికశాఖ మంత్రిత్వశాఖ కార్యాలయాల అధికారులను తరచూ కలిసే విజయసాయిరెడ్డి..తనకు కేంద్రమంత్రులతో సన్నిహత సంబంధాలున్నట్టుగా చిత్రీకరించి సాక్షుల్లో ప్రత్యక్షంగా, పరోక్షంగా భయం కలిగిస్తున్నారని పిటిషన్‌లో రఘురామ పేర్కొన్నారు. ఎంపీ అవగానే..జగన్ అక్రమాస్తుల కేసుల ప్రధాన దర్యాప్తు అధికారిగా వ్యవహరించిన అధికారిని...సీబీఐ జేడీ చేయవద్దని కేంద్ర హోంమంత్రికి లేఖ రాశారని..ఇది విచారణ ప్రక్రియలో జోక్యం చేసుకోవడమేనని ఆరోపించారు. మాన్సాస్ ట్రస్టు వ్యవహారంలో అశోక్‌ను జైలుకు పంపుతామని విజయసాయిరెడ్డి వ్యాఖ్యానించడం..కోర్టు ధిక్కరణే కాక, న్యాయవ్యవస్థపై ఆయన దృక్పథాన్ని తేటతెల్లం చేస్తోందని పేర్కొన్నారు.
వైకాపా ప్రభుత్వంలో విజయసాయిరెడ్డి కీలకపాత్ర పోషిస్తున్నారని..సీఎం జగన్‌తో కలిసి ఫాసిస్టు ధోరణితో ప్రజలపై అరాచకాలకు పాల్పడుతున్నారని వ్యాజ్యంలో రఘురామ ఆరోపించారు. ఎంపీగా, వైకాపా జాతీయ ప్రధాన కార్యదర్శిగా, జగన్ ఆర్థిక సలహాదారు, ఆడిటర్గా వ్యవహరిస్తున్న విజయసాయిరెడ్డి..ఏపీలోని అన్ని ప్రభుత్వ శాఖలు, పాలసీల వ్యవహారాల్లో జోక్యం చేసుకుంటున్నారన్నారు. జగన్ ఆర్థిక నేరాల క్విడ్ప్రో కోలను బయటపెట్టగల కీలక వ్యక్తిగా ఉన్నారని పేర్కొన్నారు. తన అక్రమ సంపాదన కోసం దేశానికి నష్టం కలిగించారన్న తీవ్రమైన అభియోగాలు విజయసాయిరెడ్డిపై ఉన్నాయని ప్రస్తావించారు. విచారణకు సహకరిస్తానంటూ కోర్టుకు హామీ ఇచ్చిన ఆయన..చిన్న చిన్న కారణాలు చూపుతూ కోర్టుకు గైర్హాజరువుతున్నారన్నారు. సాక్షులను ప్రభావితం చేస్తున్న విజయసాయిరెడ్డి బెయిల్‌ను కొట్టివేయాలని సీబీఐ కోర్టును రఘురామ కోరారు. ఈ వ్యాజ్యం సీబీఐ కోర్టు కార్యాలయం పరిశీలనలో ఉంది.
ఇదీ చదవండి
viveka murder case: వివేకా హత్య కేసులో కీలక పరిణామం.. సునీల్‌ యాదవ్‌ అరెస్ట్
