ప్రపంచంలోనే అతిపెద్ద ప్రభుత్వ, ప్రైవేట్ భాగస్వామ్య ప్రాజెక్ట్గా హైదరాబాద్ మెట్రో ఆవిర్భవించింది. ప్రాజెక్టు నిర్మాణానికి రూ.14 వేల 132 కోట్లు వెచ్చించారు. ఇందులో ఎల్.అండ్.టీ రూ.12 వేల 674 కోట్లు ఖర్చు చేసింది. రాష్ట్ర ప్రభుత్వం రూ.3వేల కోట్లు ఆస్తుల సేకరణ కోసం ఖర్చు చేసింది. కేంద్ర ప్రభుత్వం రూ.1,458 కోట్లు సర్దుబాటు వ్యయనిధిని ఏర్పాటు చేసింది. ప్రభుత్వ ప్రైవేట్ భాగస్వామ్యంతో చేపట్టిన హైదరాబాద్ మెట్రో రైలు ప్రాజెక్టును టెండర్లలో ఎల్.అండ్.టీ మెట్రో దక్కించుకుంది.
2012 జూన్లో ఒప్పందం
మూడు కారిడార్లలో 72 కిలోమీటర్ల పనులను ఐదేళ్లలో పూర్తి చేస్తామని 2012 జూన్లో ప్రభుత్వంతో ఒప్పందం కుదిరింది. 2012 జూలై 5న అపాయింటెడ్ డేగా అప్పటి ప్రభుత్వం నిర్ణయించింది. 2017 జూలై 4 నాటికి పనులన్నీ పూర్తి చేయాల్సి ఉండగా అలైన్మెంట్ వివాదాలు, ఆస్తుల సేకరణలో జాప్యం, రైల్వేల అనుమతి తదితర కారణాలతో కేవలం 30 కిలోమీటర్లు మాత్రమే పనులు పూర్తయ్యాయి. మిగతా పనులు వేర్వేరు దశల్లో ఉండడం వల్ల ఎల్.అండ్.టీ మెట్రో అభ్యర్థన మేరకు అప్పట్లో సర్కారు నిర్మాణ పనుల పూర్తికి 2018 నవంబర్ వరకు ఒప్పందం పొడిగించింది.
మరో 6 నెలలు పొడిగింపు
అలైన్మెంట్ వివాదం తేలకపోవడం వల్ల పాతబస్తీలో మెట్రో పనులు మినహాయించింది. అప్పటికీ కేవలం 46 కిలోమీటర్ల పనులు మాత్రమే పూర్తయ్యాయి. కీలకమైన జేబీఎస్, రాయదుర్గం మార్గంలో మెట్రో పనులు పూర్తికాకపోవడం వల్ల పనుల పూర్తి గడువును సర్కారు మరోసారి 2019 డిసెంబర్ వరకు పొడిగించింది. 66 కిలోమీటర్ల పనులన్నీ పూర్తయ్యాయి. ప్రస్తుతం జేబీఎస్ నుంచి ఎంజీబీఎస్ మార్గంలో ట్రయల్ రన్స్ నడుస్తున్నాయి. ఈ రూట్ను మున్సిపల్ ఎన్నికల అనంతరం ప్రారంభించే అవకాశం ఉందని అధికారులు అంటున్నారు. వీటన్నింటిని పరిగణలోకి తీసుకుని మరో ఆరునెలల గడువు పొడిగించిందని మెట్రో అధికారులు వెల్లడించారు.
ఇవీ చూడండి:
నేడు వైఎస్ఆర్ ఆరోగ్యశ్రీ కార్డుల పంపిణీ...ఏలూరులో సీఎం శ్రీకారం
