తెలంగాణ, ఆంధ్రప్రదేశ్ 2019-20 సంవత్సరంలో వినియోగించిన జలాల లెక్కలు తేల్చేందుకు కృష్ణా నదీ యాజమాన్య బోర్డు కసరత్తు చేస్తోంది. ఇందులో భాగంగా బోర్డు ఎస్ఈ ఈ నెల 24న ప్రత్యేక సమావేశాన్ని నిర్వహించనుంది. గత సంవత్సరంలో రెండు రాష్ట్రాలు వినియోగించిన నీటికి సంబంధించిన వివరాలను పరిశీలించి అధికారులు సరిచేయనున్నారు.
శ్రీశైలానికి సంబంధించి 807, నాగార్జునసాగర్కు సంబంధించి 510 అడుగుల మట్టాన్ని పరిగణనలోకి తీసుకొని వివరాలు ఖరారు చేయాలని తెలంగాణ ఇప్పటికే బోర్డుకు స్పష్టం చేసింది. ఆ లేఖను ఏపీకి పంపిన బోర్డు.. తెలంగాణ అభిప్రాయాన్ని తెలిపింది. అటు కృష్ణా డెల్టా, కల్వకుర్తి ఎత్తిపోతల, కేసీ కెనాల్కు సంబంధించిన వివరాలు 2019 డిసెంబర్ నుంచి సరిచేయాల్సి ఉందని, పోతిరెడ్డిపాడు హెడ్ రెగ్యులేటర్, సరిహద్దు వద్ద సాగర్ ఎడమ కాల్వ వివరాలను 2019 ఏప్రిల్ నుంచి సరిచేయాల్సి ఉందని బోర్డు పేర్కొంది.
వీటన్నింటిని దృష్టిలో ఉంచుకొని ఇరు రాష్ట్రాల ఇంజినీర్లతో కృష్ణా నదీయాజమాన్య బోర్డు ఎస్ఈ అక్టోబర్ 24న సమావేశం నిర్వహించనున్నారు. ఈ మేరకు రెండు రాష్ట్రాల ఈఎన్సీలకు బోర్డు సభ్యకార్యదర్శి హరికేశ్ మీనా లేఖ రాశారు.
ఇదీ చదవండి: ఆరోగ్య శ్రీ నెట్ వర్క్ ఆసుపత్రులకు నిధుల విడుదల
