రణరంగంలా ప్రాదేశిక ఎన్నికల నామినేషన్ల ఉపసంహరణ

జడ్పీటీసీ,ఎంపీటీసీ అభ్యర్థుల నామినేషన్ ఉపసంహరణ ప్రక్రియ రణరంగంలా మారింది. సామ, దాన, భేద, దండోపాయాలతో ప్రతిపక్ష అభ్యర్థులను ఎక్కడికక్కడ బెదిరించిన అధికార పార్టీ నేతలు... వారి చేత బలవంతపు ఉపసంహరణ చేయించినట్లు ఆరోపణలొస్తున్నాయి. మహిళలనైనా చూడకుండా దౌర్జన్యం ప్రదర్శించటంతో వారు కన్నీరుమున్నీరయ్యారు. కొన్ని చోట్ల గడువు దాటినా... ఉపసంహరణలను అధికారులు అనుమతించారు

ప్రాదేశిక ఎన్నికల్లో నామినేషన్లు వేయకుండానే బలవంతంగా అడ్డుకున్న అధికారపక్షం...ఉపసంహరణ రోజూ అదే తీరు ప్రదర్శించింది. తమ మాట వినకుండా నామపత్రాలు దాఖలు చేసిన వారు ఉపసంహరించుకునేలా బలవంతంగా ఒత్తిడి తీసుకొచ్చింది. నామినేషన్ల ఉపసంహరణ సందర్భంగానూ రాష్ట్రంలో పలుచోట్ల ఉద్రిక్త పరిస్థితులు కొనసాగాయి. ఎన్నికల అధికారుల వద్దకు బలవంతంగా లాక్కెళ్లి మరీ నామినేషన్లు ఉపసంహరించుకునేలా వైకాపా నేతలు ప్రయత్నించారు.

ఉపసంహరణకు 20లక్షలు...

మరికొన్ని చోట్ల విపక్ష అభ్యర్థుల నామపత్రాలు సరిగా లేవంటూ అధికారులు తిరస్కరించారు. విశాఖ జిల్లా నర్సీపట్నంలోని 3వ వార్డు కౌన్సిలర్‌ స్థానానికి వైకాపా అభ్యర్థి అరుణకుమారి వేసిన నామినేషన్‌పై వివాదం నెలకొంది. ఆమె ఎస్సీ కాదని తెదేపా శ్రేణులు ఆరోపించగా... ఆమెకు కొన్నేళ్ల క్రితమే ఎస్సీ గా కుల ధ్రువీకరణ పత్రం లభించిందని వైకాపా నేతలు వాదించారు. నామినేషన్ ఉపసంహరించుకోవాలంటూ వైకాపా నేతలు 20 లక్షలు ఆశ చూపారని తూర్పుగోదావరి జిల్లా రావులపాలెం తెలుగుదేశం జడ్పీటీసీ అభ్యర్థి శ్రీనివాస్‌ తెలిపారు. తన సంతకాన్ని ఫోర్జరీ చేసి నామనే।షన్ ఉపసంహరించారంటూ పశ్చిమగోదావరి జిల్లా పెదగరువు భాజపా ఎంపీటీసీ అభ్యర్థి భాను ప్రమీల కన్నీరుమున్నీరుగా విలపించారు. వైకాపా శ్రేణులతో చేతులు కలిపిన పోలీసులు... తమ పార్టీ అభ్యర్థుల చేత బలవంతంగా నామినేషన్లు ఉపసంహరిచుకునేలా చేశారని తెదేపా నేతలు యరపతినేని శ్రీనివాసరావు, అనగాని సత్యప్రసాద్‌ ఆరోపించారు.

తమ ప్రమేయం లేకుండానే...

చిత్తూరు జిల్లా కార్వేటినగరం జడ్పీటీసీ స్థానంలో వైకాపా తరపున ఉపముఖ్యమంత్రి నారాయణస్వామి సతీమణి పరంజ్యోతి పోటీ చేయగా...ఆ స్థానంలో పోటీలో ఉన్న తెలుగుదేశం అభ్యర్థి మృదుల నామినేషన్ ఉపసంహరించుకున్నట్లు కన్నీటిపర్యంతమైంది. చాలా చోట్ల తమ ప్రమేయం లేకుండానే నామినేషన్ల ఉపసంహరణ తంతు జరిగిపోయిందని అభ్యర్థులు ఆవేదన వ్యక్తం చేశారు.

ప్రకాశం జిల్లా మార్కాపురం నియోజకవర్గంలో ఎంపీటీసీ, జడ్పీటీసీ ఎన్నికలకు దూరంగా ఉండాలని నిర్ణయించుకున్నట్టు మాజీ ఎమ్మెల్యే కందుల నారాయణరెడ్డి వెల్లడించారు. కర్నూలు, అనంతపురం, కడప జిల్లాల్లో ఎన్నికల అధికారులు వైకాపాకు అనుకూలంగా వ్యవహరిస్తున్నారని ఆరోపించిన విపక్షాలు... ఉన్నతాధికారులకు ఫిర్యాదు చేశాయి. కర్నూలు జిల్లా ఎమ్మిగనూరు మండలంలోని కడివెళ్ల ఎంపీటీసీ-1 స్థానం నుంచి స్వతంత్రంగా పోటీకి దిగిన తన కూతురు మహాలక్ష్మి చేత బలవంతంగా నామినేషన్‌ ఉపసంహరించారని ఆమె తండ్రి ఆవేదన వ్యక్తం చేశారు.

ఇవీ చూడండి-కరోనాపై వైద్య శాఖ అప్రమత్తం.. ప్రత్యేక వార్డులు సిద్ధం