Electricity Tariffs: ఏపీలో విద్యుత్ ఛార్జీల మోత మోగింది. కరెంట్‌ ఛార్జీలను పెంచుతూ విద్యుత్ నియంత్రణ మండలి (ఈఆర్సీ) నిర్ణయం తీసుకుంది. 30 యూనిట్ల వరకూ ఉన్న స్లాబ్కు 1.90 రూపాయల చొప్పున వసూలు చేయనున్నారు. ఈ స్లాబ్లో యూనిట్కు 45 పైసల చొప్పున పెంచారు. ఇక 31-75 యూనిట్ల వరకూ ఉన్న స్లాబ్కు యూనిట్కు రూ.3 వసూలు చేసుకునేందుకు డిస్కమ్లకు అనుమతి ఇచ్చారు. ఈ స్లాబ్లో యూనిట్కు 91 పైసల చొప్పున పెరుగుదల నమోదు అయ్యింది.
ఇక 76 -125 యూనిట్ల మధ్య ఉన్న స్లాబ్కు యూనిట్ ధర రూ.4.5 చేశారు. ఈ స్లాబ్లో వినియోగ దారులకు రూ.1.40 చొప్పున ప్రతి యూనిట్పై భారం పడనుంది. ఇక 126-225 వరకూ ఉన్న స్లాబ్లో యూనిట్ ధర రూ.6 పెంచేందుకు ఏపీఈఆర్సీ అనుమతి ఇచ్చింది. ఒక్కో యూనిట్కు రూ.1.57 చొప్పున పెరిగుదల నమోదు అయ్యింది. 226-400 యూనిట్ల వరకూ ప్రతీ యూనిట్కు రూ.8.75 చొప్పున పెంచేందుకు ఈఆర్సీ అనుమతి మంజూరు చేసింది. ఈ స్లాబ్లో ప్రతీ యూనిట్కు గతంలో కంటే రూ.1.16 చొప్పున పెరుగుదల నమోదు అయ్యింది. 400 ఆపైన యూనిట్లకుగానూ రూ.9.75 చొప్పున పెంపుదలకు అనుమతి ఇచ్చారు. ప్రతీ యూనిట్కు 55 పైసల చొప్పున పెంచుతూ ఈఆర్సీ నిర్ణయం తీసుకుంది.
పెంచిన విద్యుత్ ఛార్జీలు ఏప్రిల్ నుంచి అమల్లోకి వస్తాయని ఏపీఈఆర్సీ ఛైర్మన్ సీవీ నాగార్జున రెడ్డి స్పష్టం చేశారు. 5 కేటగిరీలు రద్దుచేసి కొత్తగా 6 శ్లాబులు ఏర్పాటు చేసినట్లు ఆయన తెలిపారు. ధరలు పెంచడం ఇబ్బందైనా.. తప్పని పరిస్థితి నెలకొందన్నారు. పెరిగిన ఛార్జీలతో పంపిణీ సంస్థలకు రూ.1400 కోట్లు అదనపు ఆదాయం చేకూరుతుందని నాగార్జున రెడ్డి వెల్లడించారు.
ఇదీ చదవండి: బొగ్గు కొరత లేకుండా చూసుకోండి.. ఏపీ ట్రాన్స్కోకు సూచన
