ఎన్సీఆర్బీ నివేదిక ప్రకారం రాష్ట్రంలో రైతులు, రైతు కూలీల ఆత్మహత్యలు 55 శాతం పెరిగాయంటే, జగన్ పాలనపై అన్నదాతల్లో పెరిగిన నిరాశా నిస్పృహలకు నిదర్శనమని చంద్రబాబు దుయ్యబట్టారు. మచిలీపట్నం పార్లమెంటు నియోజకవర్గ తెదేపా నేతలతో ఆయన వీడియో కాన్ఫరెన్స్ నిర్వహించారు. ఆదుకునేవాళ్లు లేక రాష్ట్ర రైతులు ఆగమ్యగోచరంలో ఉంటే, బడుగు బలహీన వర్గాల బతుకు దుర్భరంగా మారాయని చంద్రబాబు ధ్వజమెత్తారు.
'వైకాపా నేతల నుంచి తమ భూములు, పంటలను కాపాడుకునేందుకు రైతులు ఆత్మహత్యాయత్నాలకు పాల్పడుతున్నారు. గుంటూరు జిల్లా పోతుమర్రులో పంట కాపాడుకునేందుకు సలీమ్ కత్తితో పొడుచుకుంటే, అసైన్డ్ భూములను కాపాడుకోడానికి ఎస్సీ, ఎస్టీ మహిళలు పురుగుమందు డబ్బాలతో తిరగాల్సి వస్తోంది. భూముల ఆక్రమణ, తోటల నరికివేత, పంటలు దున్నేయడం, బోర్లు ధ్వంసం చేయడం, ఆర్థిక మూలాలు దెబ్బతీయడం వంటి కక్షసాధింపు చర్యలు రాష్ట్ర చరిత్రలో లేవు. వైకాపా నాయకుల కన్నుపడ్డ భూమి గల్లంతే. భూబకాసురుల్లా మారి భూములను మింగేస్తూ, భూరక్ష-భూహక్కు అనటం దయ్యాలు వేదాలు వల్లించటమే' అని చంద్రబాబు విమర్శించారు.
వ్యవసాయ భూమి మట్టిలో కప్పెట్టే సరిహద్దు రాళ్లకు జగన్ రెడ్డి ఫోటోలతో కూడిన గ్రానైట్ రాళ్లు పెట్టడం మరో తుగ్లక్ చర్య. తెదేపా ప్రభుత్వం చేపట్టిన రైతు సంక్షేమ పథకాలన్నీ రద్దు చేశారు. రైతులకింత నమ్మకద్రోహం చేసిన పార్టీని, ప్రభుత్వాన్ని చూడలేదు. నైరాశ్యంలో ఉన్న రైతులు, రైతుకూలీలకు తెదేపా నాయకులు, కార్యకర్తలు అండగా నిలవాలి. ‘రైతుకోసం ఉద్యమాన్ని ఉద్ధృతం చేయాలి. ఆత్మహత్య చేసుకున్న రైతు కుటుంబాలను పరామర్శించి వారిలో మనోధైర్యం పెంచి వైకాపా రైతు వ్యతిరేక చర్యలను ప్రజల్లో ఎండగట్టాలి.
- చంద్రబాబు, తెదేపా అధినేత
ఎన్నికలు ఎప్పుడొచ్చినా శ్రేణులంతా సిద్ధంగా ఉండాలి
ఎన్నికలు ఎప్పుడొచ్చినా తెదేపా శ్రేణులంతా సంసిద్ధంగా ఉండాలని చంద్రబాబు దిశానిర్ధేశం చేశారు. స్వార్థం కోసం రాష్ట్రాన్ని, భావితరాల భవిష్యత్ను కాలరాసే చర్యలకు వైకాపా నాయకులు పాల్పడితే సహించేది లేదని హెచ్చరించారు. ప్రజా చైతన్యంతోనే అరాచకాలకు అడ్డుకట్ట వేయాలని సూచించారు. 'సమాజం, రాష్ట్రం, భావితరాల భవిష్యత్తే ముఖ్యం. సంక్షోభంలో సరైన నాయకత్వం ఇచ్చి, బాధల్లో ఉండే ప్రజలకు అండగా ఉండేవాళ్లే హీరోలు. వీరోచితంగా పోరాడేవాళ్లకే ప్రజాదరణ ఉంటుంది. వైకాపా దుర్మార్గాలపై రాజీలేని పోరాటం చేస్తూ, ప్రజల్లో చైతన్యం పెంచాలి.' అని చంద్రబాబు కోరారు.
ఏ రాజ్యమో వర్ణించలేని స్థితి
20 నెలల్లోనే ఎన్ని అరాచకాలు చేయాలో అన్నీ చేశారని చంద్రబాబు అన్నారు. ఇది రాక్షస రాజ్యమా, ఆటవిక రాజ్యమా, కిరాతక రాజ్యమా వర్ణించలేని స్థితి అని విమర్శించారు. మహిళలపై నిత్యం అఘాయిత్యాలు పెరిగి, నేరగాళ్లు చెలరేగిపోతుంటే చర్యలు లేకపోవటం శోచనీయమన్నారు. బీసీ నేత కొల్లు రవీంద్రపై అక్రమ కేసులు వైకాపా వేధింపులకు పరాకాష్ట. ఇంట్లో ఉంటే ఒక కేసు, బయటకు వస్తే మరో కేసు ఇలా తప్పుడు కేసుల జమానాగా జగన్ పాలన ఉందని అభిప్రాయపడ్డారు. యథేచ్ఛగా దోపిడి చేసి, ప్రత్యర్థులపై బురదజల్లి ప్రజలను మభ్యపెట్టడంలో జగన్మోహన్ రెడ్డి దిట్ట అని విమర్శించారు. తప్పుడు కేసులు, అక్రమ నిర్బంధాలతో వైకాపా ప్రజలకు దూరమైంది. మెజారిటీ ఉందని విర్రవీగితే ప్రజలే ఆ పొగరు దించేస్తారని చంద్రబాబు హెచ్చరించారు.
సుంకాల సీఎం జగన్
తాగే నీరు, మరుగుదొడ్డి, కాలిబాట, వీధి దీపం, తాతలు ఇచ్చిన ఆస్తి, నుంచున్నా, కూర్చున్నా పన్నులు విధిస్తూ సుంకాల సీఎంగా జగన్మోహన్ రెడ్డి మారారని చంద్రబాబు అన్నారు. తెదేపా కృషి వల్లే దేశంలో హర్యానా తర్వాత కృష్ణా జిల్లా అత్యధిక తలసరి ఆదాయం గల జిల్లాగా మారిందన్నారు. రూ.11,924కోట్లతో 2 దశల్లో బందరు పోర్టు నిర్మాణానికి శ్రీకారం చుడితే జగన్మోహన్ రెడ్డి తన బినామీల పరం చేసేందుకే కాంట్రాక్టు రద్దు చేశారన్నారు. విశాఖ నుంచి నెల్లూరు వరకూ కోస్తాతీరాన్ని కబళించడమే జగన్ ధ్యేయమని చంద్రబాబు అన్నారు. విశాఖ బాక్సైట్, కాకినాడ సెజ్, మచిలీపట్నం పోర్టు, ఇలా నెల్లూరు వరకూ ఉన్న తీరప్రాంత సంపదను జగన్ తన బినామీలకు హస్తగతం చేసే కుట్రలు చేస్తున్నారని చంద్రబాబు ఆరోపించారు.
సమావేశంలో పార్టీ రాష్ట్ర అధ్యక్షుడు అచ్చెన్నాయుడు, మాజీ ఎంపీ కొనకళ్ల నారాయణ, మండలి బుద్దప్రసాద్, కొల్లు రవీంద్ర, కాగిత కృష్ణప్రసాద్, బోడె ప్రసాద్, వైవిబి రాజేంద్ర ప్రసాద్, బచ్చుల అర్జునుడు, కె అప్పలనాయుడు, ఉప్పులేటి కల్పన, రావి వెంకటేశ్వర రావు తదితరులు పాల్గొన్నారు.
ఇదీ చదవండి: దేవుడి సాక్షిగా.. అనపర్తి ఎమ్మెల్యే, మాజీ ఎమ్మెల్యే ఏమని ప్రమాణం చేశారంటే?
