విజయవాడ ఆత్కూరు పోలీసుస్టేషన్‌ పరిధిలోని వీరపనేనిగూడెంలోని సప్తగిరి గ్రామీణ బ్యాంకులో ఏపీ కోపరేటివ్‌ ఆయిల్‌ సీడ్స్‌ గ్రోయర్స్‌ ఫెడరేషన్‌ లిమిటెడ్‌కు చెందిన ఫిక్స్డ్ డిపాజిట్లు దుర్వినియోగం, దారిమళ్లింపు జరిగినట్లు ఆ సంస్థ మేనేజర్ చలపాక రమణమూర్తి ఈనెల 14న పోలీసులకు ఫిర్యాదు చేశారు. ఈ కేసులో ఐదు కోట్ల రూపాయల ఫిక్స్డ్ డిపాజిట్లను నకిలీ పత్రాలు సృష్టించి ఆయిల్‌ సీడ్స్‌ గ్రోయర్స్‌ ఫెడరేషన్‌ లిమిటెడ్‌ ఉద్యోగుల సంతకాలను ఫోర్జరీ చేసి వేర్వేరు బ్యాంకు ఖాతాలకు మళ్లించి దుర్వినియోగం చేసినట్లు ప్రాథమికంగా నిర్ధరించారు.
ఈ ఏడాది మేలో ఈ కుంభకోణం జరిగినట్లు అనుమానిస్తున్నారు. ఇదే సమయంలో ఏపీ స్టేట్‌ వేర్‌హౌస్‌ కార్పొరేషన్‌కు చెందిన 9 కోట్ల 60 లక్షల రూపాయల ఫిక్స్డ్ డిపాజిట్లను భవానీపురం ఇండియన్‌ ఓవర్‌సీస్‌ బ్యాంకులో ఉంచారు. రాష్ట్ర గిడ్డంగుల సంస్థ ఉద్యోగుల సంతకాలు, నకిలీ ధ్రువపత్రాలతో కరెంట్‌ అకౌంట్‌ తెరిచి
ఆ అకౌంట్‌ నుంచి ఫిక్స్డ్ డిపాజిట్లను వివిధ బ్యాంకు ఖాతాల్లోకి మళ్లించి దుర్వినియోగం చేసినట్లు.....ఆ సంస్థ మేనేజర్ పట్టాభిరామయ్య ఈనెల 15న పోలీసులకు ఫిర్యాదు చేశారు.ఈ రెండు కేసులను సీసీఎస్. ద్వారా పూర్తిస్థాయిలో దర్యాప్తు చేయిస్తున్నట్లు సీపీ శ్రీనివాసులు చెప్పారు..
రాష్ట్ర గిడ్డంగుల సంస్థకు చెందిన 9 కోట్ల 60 లక్షల రూపాయల ఫిక్స్డ్ డిపాజిట్‌ మొత్తాన్ని ఐవోబీ బ్యాంకు తిరిగి సంస్థ ఖాతాలో జమ చేసింది. వడ్డీ మొత్తం కూడా ఇస్తామని బ్యాంకు ఉన్నతాధికారులు వేర్‌హౌస్‌ కార్పొరేషన్‌కు సమాచారం అందించారు. ఈ కుంభకోణం ఎవరి సహకారంతో జరిగింది? డబ్బులు బయటకు వెళ్లడం.. మళ్లీ వెనక్కు రావడంలో కీలకంగా వ్యవహరించింది ఎవరనేది తమ దర్యాప్తులో నిగ్గు తేలుస్తామని పోలీసు అధికారలు తెలిపారు.
ఇదీ చదవండి: Corona Update: దేశంలో కొత్తగా 14,146 కరోనా కేసులు
