Amaravati maha pada yathra: అమరావతి రైతులకు మద్దతుగా..రాష్ట్రవ్యాప్తంగా సంఘీభావ ర్యాలీలు జరుగుతున్నాయి. రాజమహేంద్రవరంలో.. తాడితోట జంక్షన్‌ వద్ద రాజకీయ పార్టీలు ప్రదర్శన నిర్వహించాయి. ర్యాలీలో తెదేపా, కాంగ్రెస్‌, వామపక్ష నాయకులు పాల్గొన్నారు. ఏకైక రాజధానిగా అమరావతిని కొనసాగించాలని నినాదాలు చేశారు. అమరావతి రైతుల పాదయాత్రకు మద్దతుగా గుడివాడ, గన్నవరంలో తెదేపా శ్రేణులు సంఘీభావ ర్యాలీ నిర్వహించారు. కర్నూలు జిల్లా అదోనిలో భారీ ప్రదర్శన చేపట్టారు. ఒకే రాష్ట్రం- ఒకే రాజధాని అంటూ... తెదేపా కార్యాలయం నుంచి ఎన్టీఆర్ విగ్రహం వరకు ర్యాలీ నిర్వహించారు.
అనంతపురం జిల్లాలో..
Ananthapuram: అనంతపురం జిల్లా రాయదుర్గం నియోజకవర్గంలోని డీ హిరేహాల్ మండలం కల్యం గ్రామంలో అమరావతి రైతులకు మద్దతుగా తెదేపా నేత, మాజీ మంత్రి కాల్వ శ్రీనివాసులు తెదేపా నాయకులతో కలిసి శ్రీ ఆంజనేయ స్వామి ఆలయంలో పూజలు నిర్వహించారు. కల్యం గ్రామం నుంచి మురడి వరకు పాదయాత్ర నిర్వహిస్తున్నారు. మురడి గ్రామంలో జరుగు తెలుగుదేశం పార్టీ గౌరవ సభకు తేదేపా శ్రేణులతో కలిసి కాల్వ హాజరుకానున్నారు. కాల్వ పాదయాత్రలో తెదేపా నేత అనంతపురం జిల్లా పరిషత్ మాజీ చైర్మన్ పూల నాగరాజు, తెదేపా నాయకులు కార్యకర్తలు పెద్ద ఎత్తున పాల్గొన్నారు.
కడపలో..
Kadapa: అమరావతిని రాజధానిగా కొనసాగించాలని కడప తెదేపా బాధ్యులు అమీర్ బాబు డిమాండ్ చేశారు. అమరావతి రైతుల ర్యాలీకి మద్దతుగా కడపలో తేదేపా ఆధ్వర్యంలో సంఘీభావ ర్యాలీ చేపట్టారు. ఎన్టీఆర్ విగ్రహం నుంచి గాంధీ విగ్రహం వరకు ర్యాలీ కొనసాగింది. అమరావతిని రాజధానిగా కొనసాగించాలని నినాదాలు చేశారు. ఎక్కడైనా రాష్ట్రానికి ఓకే రాజధానిగా ఉంటుందని ఆ విషయాన్ని ప్రజాప్రతినిధులను గుర్తుంచుకోవాలని కోరారు. కేవలం జగన్ సర్కార్ తన ఆర్థిక లావాదేవీల కోసం రాజధానిని విశాఖపట్టణానికి బదిలీ చేస్తున్నారని ఆరోపించారు. విశాఖపట్నాన్ని రాజధాని చేయడం వల్ల చాలా ప్రాంతాల ప్రజలు తీవ్ర ఇబ్బందులు ఎదుర్కొంటారని అన్నారు. రాజధాని కోసం రైతులు కొన్ని వేల ఎకరాల భూములు ఇచ్చారని పేర్కొన్నారు. అమరావతి రాజధానిగా ఉంచడం రాష్ట్ర ప్రజలందరికీ సమ్మతం అనే అంశాన్ని ప్రభుత్వం గుర్తుంచుకోవాలని తెలిపారు.
గుడివాడలో..
Gudivada: అమరావతి రైతులు చేస్తున్న మహా పాదయాత్రకు సంఘీభావంగా గుడివాడ నియోజకవర్గ తెలుగుదేశం పార్టీ ఆధ్వర్యంలో ఇంఛార్జి రావి వెంకటేశ్వర రావు అధ్యక్షతన సంఘీభావ ర్యాలీని నిర్వహించారు. గుడివాడ తెలుగుదేశం పార్టీ కార్యాలయం నుంచి ర్యాలీని ప్రారంభించారు. వైకాపా నాయకులకు మంచి బుద్ధి దయ చేయాలని నాగవరప్పాడులోని దాసాంజనేయ స్వామి వారి దేవస్థానంలో తెదేపా నాయకులు ప్రత్యేక పూజలు నిర్వహించారు. వైకాపా ప్రభుత్వం ఏర్పడిన రెండున్నర సంవత్సరాలలో రాష్ట్రం పూర్తిగా వెనకబడి పోయిందని, వైకాపా నాయకులు రాజకీయ పబ్బం గడుపుకునేందుకే మూడు రాజధానుల నాటకానికి తెరలేపారని రావి వెంకటేశ్వర రావు మండిపడ్డారు. ఈ కార్యక్రమంలో గుడివాడ నియోజకవర్గం తెదేపా నాయకులు కార్యకర్తలు పాల్గొన్నారు.
ప్రకాశం జిల్లాలో...
Prakasam: ప్రకాశం జిల్లా కనిగిరిలో అమరావతి రైతుల మహా పాదయాత్ర ముగింపు సందర్భంగా కనిగిరి తెదేపా శ్రేణులు పార్టీ కార్యాలయం నుండి ప్రధాన కూడళ్ల మీదుగా ఒంగోలు బస్టాండ్ కూడలిలో ఉన్న అంబేద్కర్ విగ్రహం వరకు అమరావతి రైతుల పాదయాత్ర విజయోత్సవ సంఘీభావ ర్యాలీ చేశారు. కనిగిరి తెదేపా శ్రేణులు తెదేపా పార్టీ కార్యాలయం నుండి ఫ్లెక్సీ బ్యానర్లను ప్రదర్శిస్తూ జెండాలతో నినాదాలు చేస్తూ కనిగిరి లోని ప్రధాన వీధుల గుండా అంబేద్కర్ విగ్రహం వరకు ర్యాలీ చేపట్టారు. అనంతరం అంబేద్కర్ విగ్రహానికి పూలమాలలు వేశారు.
ఇదీ చదవండి: Amaravathi padayatra: ఆంక్షలు ఎదురైనా సడలని సంకల్పం.. అకుంఠిత దీక్షతో యాత్ర పూర్తి
