రాష్ట్ర వ్యాప్తంగా కొవిడ్ కేసులు తగ్గుముఖం పడుతున్నాయని వైద్యారోగ్య ముఖ్య కార్యదర్శి అనిల్ కుమార్ సింఘాల్ వివరించారు. రోజువారి నమోదవుతున్న పాజిటివ్ కేసులు 5-6వేలకు తగ్గాయన్న సింఘాల్.. యాక్టివ్ కేసులు గణనీయంగా తగ్గాయన్నారు. రేపటి నుంచి తూర్పుగోదావరి జిల్లా మినహా మిగతా జిల్లాల్లో కర్ఫ్యూ ఆంక్షలు సడలిస్తున్నట్లు తెలిపారు. ఉదయం 6 నుంచి సాయంత్రం 6 గంటల వరకూ తూర్పుగోదావరి జిల్లా మినహా అన్ని జిల్లాల్లో కర్ఫ్యూ సడలింపులు ఉంటాయని వివరించారు.
రాష్ట్రంలో సుమారు 96 లక్షల మందికి ఒక్క డోస్ వ్యాక్సిన్ ఇవ్వగలిగామన్న సింఘాల్.. కేంద్రం నుంచి కొత్తగా వచ్చిన 9 లక్షల డోసులు ఈ ఒక్కరోజే వేయాలని డ్రైవ్ చేపట్టామని వివరించారు. ఈరోజు 9 లక్షలకుపైగా వాక్సిన్లు వేసి.. రాష్ట్రంలో వాక్సినేషన్ సామర్ధ్యంపై కేంద్రానికి నివేదిక ఇవ్వనున్నట్లు తెలిపారు. థర్డ్ వేవ్ వచ్చినా ఎదుర్కోగలిగేలా మందులు, ఇంజెక్షన్లు, పడకలు, ఆక్సిజన్ అందుబాటులో ఉంచుతున్నట్టు వెల్లడించారు. బ్లాక్ ఫంగస్ చికిత్స కోసం ఎంఫోటెరిసిన్-బీ ఇంజెక్షన్లు ఆర్డర్ పెట్టామన్న సింఘాల్.. ప్రజలు కొవిడ్ నిబంధనలు పాటించకపోతేనే అసలైన ప్రమాదమని గుర్తించాలని కోరారు.
ఇదీ చదవండీ... RRR LETTER: అమరావతిపై సరైన దృక్పథంతో ఆలోచించండి.. సీఎం సార్: రఘురామ
