నిన్నటికి నిన్న అనంతపురంలో ఓ వృద్ధురాలి వద్ద దొంగ నటనతో ఓ కేటుగాడు బంగారం దోచుకెళ్లాడు. అలాంటి ఘటనే ఇప్పుడు నెల్లూరులో జరిగింది. కానీ ఈ దొంగ ప్రభుత్వ ఉద్యోగి అవతారం ఎత్తాడు. పింఛను ఇప్పిస్తానంటూ..చెప్పేసరికి నమ్మింది వృద్ధురాలు. తీరా బంగారం దోచుకుని వెళ్లాక... చేసేదేమీ లేక లబోదిబోమంది.
బంగారం ఉంటే పింఛను రాదమ్మా!
నెల్లూరు జిల్లా ఏఎస్ పేట మండలం మదరాబాదులో ఓ వ్యక్తి పింఛను నమోదు చేసే అధికారిని అంటూ తిరిగాడు. కాసేపయ్యాక అన్నపూర్ణ అనే వృద్ధురాలి ఇంటికి వెళ్లాడు. మీ భర్తకు వయసు అయిపోయింది.. నీ పేరుపై పెన్షన్ నమోదు చేస్తానని చెప్పాడు. ఫారం నింపాలి...ఫొటో కూడా దిగాలంటూ నమ్మించాడు కేటుగాడు. ఎలాగైతేనేం పింఛను వస్తుంది కదా అనుకుంది అన్నపూర్ణ. ఫొటో దిగేందుకు సిద్ధమైన వృద్ధురాలితో మెడలో బంగారం ఉంటే..పెన్షన్ రాదమ్మా అని చెప్పగానే నమ్మేసింది వృద్ధురాలు.
డబ్బులు కూడా!
బంగారం పక్కన పెట్టి ఫొటో దిగింది. ఆ దొంగ.. అది సరిపోదు అన్నట్లు..ఆన్లైన్లో నమోదు చేయాలంటే నాలుగు వేల రూపాయలు కావాలన్నాడు. అంత ఇచ్చుకోలేను బాబు అని మూడు వేల రూపాయలు తెచ్చి ఇచ్చింది అన్నపూర్ణ. వృద్ధురాలిని మోసగాడు కాసేపు మాటల్లో దింపి..బంగారంతో చెక్కేశాడు. బంగారం కనిపించకపోవడంతో..అవాక్కైన అన్నపూర్ణ స్థానికులతో విషయం చెప్పింది. అందరూ కలిసి ఎస్పేట పోలీసు స్టేషన్కు వెళ్లి ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేస్తున్నారు.
దొంగతనం చేయాలనుకుంటే కేటుగాళ్లు..ఎలాగైనా చేస్తారు. అవసరమైతే దశావతారాలు ఎత్తుతారు. ఎవరు వచ్చినా ముందు వెనక తెలుసుకుని నమ్మితే మంచిది. దొంగలతో తస్మాత్ జాగ్రత్త!
ఇదీ చదవండి:అవ్వా...నీరు కావాలంటూ వచ్చాడు..దోచుకెళ్లాడు!
