తూర్పుగోదావరి జిల్లా కాకినాడ దుమ్మలపేటలో మడ అడవులు నరికి వేసి పేదలకు ఇళ్ల స్థలాలకు లే అవుట్ వేసిన భూముల్ని జాతీయ హరిత ట్రైబ్యునల్ బృందం గురువారం పరిశీలించింది. ఈ భూముల్ని ఇళ్ల స్థలాలకు కేటాయించడం వల్ల జరిగే అనర్థాలను మాజీఎమ్మెల్యే వనమాడి కొండబాబు ఆధ్వర్యంలో తెలుగుదేశం నాయకులు ఎన్జీటీ బృందానికి వివరించారు. కాకినాడకు రక్షణ కవచంలా ఉన్న మడ అడవులు నరికి వేయడం వల్ల తీవ్ర సమస్యలు ఎదురవుతాయని తెలిపారు. ఈ సమస్యపై న్యాయస్థానాన్ని ఆశ్రయించిన జనసేన నాయకుడు బొల్లిశెట్టి సత్యనారాయణ కూడా.. సమస్యపై బృందానికి వివరించారు. మరోవైపు ఇళ్ల స్థలాలు కేటాయించాలంటూ స్థానిక మత్స్యకార సంఘాల నాయకులు అధికారులకు విన్నవించారు. జిల్లా ఉన్నతాధికారులు కూడా ఎన్జీటీ బృందం వెంట పర్యటించారు.
సముద్రానికి సమీపంలోని మడ అడవులు నరికి వేసి లేఅవుట్లు వేయడం తీవ్ర వివాదస్పదమైన సంగతి తెలిసిందే. ఈ వ్యవహారం ప్రస్తుతం హైకోర్టు పరిధిలో ఉంది. ప్రస్తుతం చదును చేసి మెరక చేసిన భూముల్లో నుంచి నరికి వేసిన మడ చెట్ల మొదళ్లు చిగురించి పైకి తేలాయి.
ఇదీ చదవండి
