రాజంపేటలో ఉంటున్న విదేశీ మహిళకు కడప ఎస్పీ చేయూత..

దేశం కాని దేశంలో చిగురించిన ప్రేమతో ప్రియుడితో కలిసి భారత్​కు వచ్చింది ఓ మహిళ.. ఆమెను కడప జిల్లా రాజంపేటలో ఉంచిన అతను ఉపాధి నిమిత్త కువైట్​ వెళ్లి మృతి చెందాడు. దిక్కుతోచని స్థితిలో ఉన్న ఆ మహిళ స్వదేశానికి వెళ్లలేక పోయింది. అందుకు కారణం ఆమె వీసా గడువు ముగియడమే.. రాజంపేట వాసుల ద్వారా ఈ విషయం తెలుసుకున్న జిల్లా ఎస్పీ అన్బురాజన్​ వెంటనే స్పందించారు. అధికారులతో మాట్లాడారు. ఆమెను స్వస్థలానికి పంపి మానవత్వం చాటుకున్నారు.

కడప జిల్లా రాజంపేటకు చెందిన నారాయణ కువైట్​లో డ్రైవర్​గా పని చేసేవాడు. ఈ క్రమంలో అక్కడే పనిచేస్తున్న ఇథియోపియా దేశానికి చెందిన సెటయే అనే మహిళతో ఏర్పడిన పరిచయం కాస్త ప్రేమగా మారింది. ఆ పరిచయంతో 2015లో ఆమెను నారాయణ రాజంపేటకు తీసుకొచ్చాడు. కానీ ఆర్థిక ఇబ్బందుల కారణంగా ఆమెను వివాహం చేసుకోలేదు. ఆమెను ఇక్కడే ఉంచి జీవనోపాధి కోసమని మళ్లీ కువైట్​ వెళ్లాడు. ఆమెకు డబ్బు పంపించేవాడు. ఈ క్రమంలో దురదుష్టవశాత్తు ఏడాది క్రితం నారాయణ గుండెపోటుతో మృతిచెందాడు. విషయం తెలుసుకున్న ఇథియోపియా మహిళ కన్నీరుమున్నీరుగా విలపించింది. ఏమి చేయాలో దిక్కుతోచని స్థితిలో ఉంది. స్థానికులు.. ఆమె దీన స్థితిని కడప జిల్లా పోలీస్ అధికారి అన్బురాజన్​కు వివరించారు. ఆయన వెంటనే స్పందిస్తూ.. ఇథియోపియా ఎంబసీ అధికారులతో మాట్లాడి వీసా తెప్పించారు. ఆమెను ఇథియోపియా పంపేందుకు ఏర్పాట్లు చేశారు. పోలీసులను బందోబస్తుగా పంపించి ఇవాళ ముంబై నుంచి ఆమెను విమానంలో స్వస్థలానికి పంపించారు. ఎస్పీకి ఆ మహిళ ధన్యవాదాలు తెలిపారు.

ఇదీ చదవండి: రిజిస్ట్రార్ ఆఫీస్​లో ప్రేమ పెళ్లి.. సడెన్​గా అమ్మాయి తల్లిదండ్రుల ఎంట్రీ.. ఆ తర్వాత..!