TDP PROTEST : ఓటీఎస్​ను వ్యతిరేకిస్తూ.. రాష్ట్రవ్యాప్తంగా తెదేపా నిరసనలు

"ఓటీఎస్ వసూళ్లు.. పేదలకు ఉరితాళ్లు" అని నినదిస్తూ.. రాష్ట్రంలోని అన్ని కలెక్టరేట్ల వద్ద తెలుగుదేశం పార్టీ నిరసన ప్రదర్శనలు చేపట్టింది. ఓటీఎస్ పేరుతో పేదల నుంచి 5వేల కోట్లు దోచుకునేందుకు అధికార పార్టీ మాస్టర్ ప్లాన్ వేసిందని ఆ పార్టీ నేతలు ఆరోపించారు. ప్రభుత్వానికి చిత్తశుద్ధి ఉంటే పేదల ఇళ్లను ఉచితంగా రిజిస్ట్రేషన్ చేసి ఇవ్వాలని డిమాండ్ చేశారు.

జగనన్న సంపూర్ణ గృహ హక్కు పథకంలో భాగంగా.. ప్రభుత్వం అమలు చేస్తున్న ఓటీఎస్ పథకానికి వ్యతిరేకంగా తెదేపా నేతలు రాష్ట్రవ్యాప్తంగా ఆందోళన చేపట్టారు. ఓటీఎస్​ను రద్దు చేయాలని డిమాండ్ చేశారు.

ప్రకాశం..
ప్రకాశం జిల్లా ఒంగోలులో ఓటీఎస్‌ పథకాన్ని వ్యతిరేకిస్తూ తెలుగుదేశం నేతలు నిరసన చేపట్టారు. భారీగా తరలివచ్చిన కార్యకర్తలు.. పార్టీ నేతలతో కలిసి ప్రభుత్వ తీరుకు వ్యతిరేకంగా నినదించారు. ర్యాలీగా కలెక్టరేట్‌ వరకూ వెళ్లి అధికారులకు వినతి పత్రం అందజేశారు. పేదలను ఓటీఎస్‌ పేరుతో వేధించడం సరికాదని తెదేపా ఎమ్మెల్యే డోలా వీరాంజనేయ స్వామి, పార్టీ నేత దామచర్ల జనార్దన్‌ మండిపడ్డారు.

తూర్పుగోదావరి..
తూర్పుగోదావరి జిల్లా కాకినాడలో తెలుగుదేశం శ్రేణులు ఓటీఎస్‌కు వ్యతిరేకంగా భారీ ఆందోళన కార్యక్రమాన్ని నిర్వహించారు. ఓటీఎస్‌ రద్దు చేయాలంటూ తెలుగుదేశం నేతలు చినరాజప్ప, జ్యోతుల నెహ్రూ, కొండబాబు నిరసన చేపట్టారు. నిరసనకారులను పోలీసుల అడ్డుకొనే ప్రయత్నం చేయగా ఉద్రిక్త పరిస్థితులు ఏర్పడ్డాయి. రోడ్డుపైనే నేతలు బైఠాయించారు.

కడప ..
కడప కలెక్టరేట్‌ ముట్టడికి తెదేపా నాయకులు ప్రయత్నించగా.. పోలీసులు అడ్డుకున్నారు. కలెక్టరేట్‌ ప్రధాన గేటు తోసుకుని వెళ్లేందుకు తెదేపా నాయకులు యత్నించారు. ఓటీఎస్‌ పథకానికి వ్యతిరేకంగా పెద్దఎత్తున నినాదాలు చేశారు. ప్రభుత్వం పేదలను మోసం చేస్తుందంటూ నేతలు మండిపడ్డారు.

గుంటూరు ..
ఓటీఎస్ రద్దు కోరుతూ.. గుంటూరులో తెలుగుదేశం పార్టీ నేతలు ర్యాలీ నిర్వహించారు. నగరపాలక సంస్థ కార్యాలయం నుంచి కలెక్టరేట్ వరకు నిరసన చేపట్టారు. మాజీ మంత్రులు ప్రత్తిపాటి పుల్లారావు, ఆలపాటి రాజా, నక్కా ఆనందబాబు, మాజీ ఎమ్మెల్యేలు జీవీ అంజనేయులు, యరపతినేని శ్రీనివాస్, కొమ్మాలపాటి శ్రీధర్, తెనాలి శ్రావణ్ కుమార్, తదితరులు ఈ ర్యాలీలో పాల్గొన్నారు. కలెక్టర్​కు వినతి పత్రం ఇచ్చేందుకు వెళ్తుండగా పోలీసులకు, తెదేపా కార్యకర్తల మధ్య తోపులాట జరిగింది. కలెక్టరేట్​ లోపలికి వెళ్లకుండా పోలీసులు స్వల్ప లాఠీ ఛార్జ్ చేశారు.

విశాఖపట్నం..
పేదలకు గుదిబండగా మారిన ఓటీఎస్ పథకాన్ని రద్దు చేసి, ఉచితంగా పేదలకు రిజిస్ట్రేషన్ చేయాలని డిమాండ్ చేస్తూ...విశాఖపట్నంలో తెదేపా ఆందోళనలు చేపట్టింది. ప్రభుత్వానికి వ్యతిరేకంగా నినాదాలు చేశారు. పార్టీ తరఫున ఓటీఎస్ పథకాన్ని తీవ్రంగా వ్యతిరేకిస్తున్నామన్నారు.

చిత్తూరు..

జగనన్న సంపూర్ణ గృహ హక్కు పథకంలో భాగంగా ప్రభుత్వం అమలు చేస్తున్న ఓటీఎస్ పథకానికి వ్యతిరేకంగా... తెలుగుదేశం పార్టీ నాయకులు చిత్తూరులోని జిల్లా సచివాలయాన్ని ముట్టడించారు. ప్రభుత్వం తీసుకు వచ్చిన ఓటీఎస్ పథకంతో పేదలకు అన్యాయం జరుగుతోందని మాజీ మంత్రి అమరనాథ రెడ్డి అన్నారు. ప్రజల నుంచి బలవంతంగా డబ్బులు వసూలు చేయడం తగదని అన్నారు. ప్రభుత్వ పథకాలు పేద ప్రజలను ఇబ్బందులకు గురి చేస్తున్నాయని ఎమ్మెల్సీ దొరబాబు అన్నారు.

అనంతపురం...
వైకాపా ప్రభుత్వానికి ప్రజలు వన్​టైమ్ సెటిల్​మెంట్ చేసేందుకు సిద్ధంగా ఉన్నారని తెదేపా ఎమ్మెల్యే పయ్యావుల కేశవ్ హెచ్చరించారు. అనంతపురంలో ఆందోళనలు నిర్వహించిన తెదేపా నేతలు...ఓటీఎస్​కు వ్యతిరేకంగా నినాదాలు చేశారు. నగరంలోని పాతూరు విద్యుత్ కార్యాలయం నుంచి కలెక్టరేట్ వరకు ర్యాలీ చేపట్టారు. ఓటీఎస్ పేదల రక్తం పీల్చే కార్యక్రమం అని మాజీ మంత్రి కాలవ శ్రీనివాసులు విమర్శించారు.

విజయనగర ..
ఓటీఎస్ పథకాన్ని వ్యతిరేకిస్తూ.. విజయనగరంలో తెలుగుదేశం శ్రేణులు కలెక్టరేట్ వద్ద నిరసన తెలిపారు. జిల్లా పరిషత్ అతిధి గృహం కూడలి పూలే విగ్రహం నుంచి కలెక్టరేట్ వరకు భారీ ర్యాలీ చేపట్టారు. అనంతరం కలెక్టరేట్ వద్ద నిరసన చేశారు. జిల్లా నలుమూలల నుంచి వచ్చిన తెదేపా శ్రేణులు ఈ కార్యక్రమంలో పాల్గొన్నారు. ఓటీఎస్ వసూళ్లు.., పేదల మెడకు ఉరి తాళ్లు అని ప్రభుత్వానికి వ్యతిరేకంగా నినదించారు. ఓటీఎస్ వసూళ్లను విరమించుకోవాలని కోరుతూ విజయనగరం పార్లమెంట్ తెదేపా అధ్యక్షుడు కిమిడి నాగార్జున... కలెక్టర్ సూర్యకుమారికి వినతిపత్రం అందచేశారు.

కర్నూలు..
కర్నూలులో తెలుగుదేశం పార్టీ ఆధ్వర్యంలో ఓటీఎస్ పథకానికి వ్యతిరేకంగా భారీ ప్రదర్శన చేశారు. తెలుగుదేశం పార్టీ కార్యాలయం నుంచి కలెక్టర్ కార్యాలయం వరకు ర్యాలీ నిర్వహించారు. అనంతరం కలెక్టర్​కు వినతిపత్రం అందించారు.

ఇవీచదవండి.