కొవిడ్ మహమ్మారి రోజురోజుకూ మరింత విస్తరిస్తోంది. గతంలో పోలిస్తే పాజిటివ్ కేసుల సంఖ్య విపరీతంగా పెరుగుతోంది. కొత్తగా 16,238 మందికి పరీక్షలు నిర్వహించగా...1178 మందికి పాజిటివ్ వచ్చింది. అంటే పరీక్షలు నిర్వహించిన ప్రతి వంద మందిలో 7.11 మందికి కరోనా సోకుతోంది. ఇప్పటి వరకు నిర్వహించిన పరీక్షలతో పోలిస్తే ఈ సంఖ్య 1.76 శాతంగానే ఉన్నా...తొలినాళ్లతో పోలిస్తే ఇప్పడు పాజిటివ్ కేసుల సంఖ్య ఎన్నో రెట్లు పెరిగింది. ఇప్పటి వరకు ఇతర రాష్ట్రాల నుంచి వచ్చిన వారిలో 2257 మందికి కరోనా సోకగా....అందులో 898 మంది మహారాష్ట్ర నుంచి వచ్చిన వారే. తెలంగాణ నుంచి వచ్చిన వారిలోనూ ఎక్కువ మందికి పాజిటివ్ వచ్చింది. విదేశాల నుంచి వచ్చిన వారిలో 420 మందికి కరోనా సోకగా...వీరిలో 337 మంది కువైట్‌ నుంచి వచ్చిన వారే ఉన్నారు.
గుంటూరులో ఉద్ధృతి
గుంటూరు జిల్లాలో కరోనా కేసులు బెంబేలెత్తిస్తున్నాయి. రెండురోజుల్లోనే 480 మందికి పాజిటివ్ రావడం ఆందోళన కలిగిస్తోంది. గుంటూరులో కేసులు మళ్లీ విపరీతంగా పెరుగుతున్నాయి. రెండురోజుల్లోనే ఏకంగా 281 కేసులు బయటపడ్డాయి. కొత్తగా తాడేపల్లిలో 24, తెనాలిలో 21, మంగళగిరిలో8, దాచేపల్లి, వినుకొండలో ఏడు కేసులు బయటపడ్డాయి. కర్నూలు జిల్లా నంద్యాలలో మళ్లీ లాక్‌డౌన్ విధించారు. విశాఖ జిల్లా అనకాపల్లిలోని దిశ పోలీస్‌స్టేషన్ ఎస్సైకి కరోనా సోకింది. సోమవారం ఇదే స్టేషన్‌ను డీజీపీ గౌతమ్‌సవాంగ్ పరిశీలించడంతో పోలీసులు ఆందోళన చెందుతున్నారు.
రాష్ట్రంలో కరోనా కేసులతోపాటు మరణాల సంఖ్య పెరగడం ఆందోళన కలిగిస్తోంది. 6 రోజుల్లోనే 65 మంది కరోనాతో మృతిచెందారు. కొత్తగా మరో 13 మంది కన్నుమూశారు. మార్చి, ఏప్రిల్, మే నెలలో 72 మంది చనిపోగా...ఒక్క జూన్‌ నెలలోనే 115 మంది మృతిచెందారు. ఇప్పటి వరకు నమోదైన మొత్తం మరణాల్లో 4వ వంతు ఈ వారం రోజుల్లోనే సంభవించాయి.
ఇదీ చదవండి : గ్యాస్ లీకేజీ ఘటనలపై ఎన్జీటీ కమిటీలు ...మూడు నెలల్లో నివేదిక
