6 సార్లు ప్లాస్మా దానం...పది మందికి ఆదర్శం

కరోనా... మనిషి జీవితాన్ని ప్రశ్నార్థకం చేయడమే కాకుండా.. మానవతా దృక్పథాన్ని కూడా తట్టిలేపింది. పట్టణాలు, గ్రామాలు అనే తేడా లేకుండా.. ఎవరికి తోచిన విధంగా వారు ఇతరులకు సహాయం చేయడానికి ముందుకు వచ్చారు. ఆ కోవలోనే... అవకాశమున్న ప్రతి సందర్భంలో నేనున్నానంటూ భరోసానిస్తున్నాడు... నాగార్జున. తక్కువ సమయంలోనే 6 సార్లు పాస్మాదానం చేసి చావుబతుకుల మధ్య ఉన్న కొవిడ్‌ బాధితుల ప్రాణాలు నిలిపాడు.

పశ్చిమ గోదావరి జిల్లా ఏలూరుకు చెందిన నాగార్జున... ఎంబీఏ పూర్తి చేశాడు. స్వచ్ఛంద సేవా కార్యక్రమాల్లో చురుగ్గా పాల్గొనే ఈ యువకుడు... కరోనా సమయంలోనూ స్నేహితులతో కలసి అనేక సేవా కార్యక్రమాలు చేపట్టాడు. వలస కూలీలకు ఆహారం, ఆర్థిక సాయం అందించాడు. బంధువులు పట్టించుకోని 18 మంది కొవిడ్‌ మృతదేహాలకు దగ్గరుండి అంతిమ సంస్కారాలు చేయించాడు.

సేవా కార్యక్రమాల్లో పాల్గొనే క్రమంలో నాగార్జున కూడా కరోనా బారిన పడ్డాడు. చికిత్స కోసం ఆస్పత్రిలో చేరాడు. అక్కడే... ప్లాస్మాదానం గురించి తెలుసుకున్నాడు. ప్లాస్మా దానానికి సిద్ధపడ్డాడు. దూరంతో సంబంధం లేకుండా.. ఎక్కడినుంచి ఫోన్‌కాల్‌ వచ్చినా.. వెంటనే వెళ్లేవాడు. కోలుకున్న తర్వాత ఇప్పటికి 6 సార్లు ప్లాస్మాదానం చేసి సేవాగుణం చాటుకుంటున్నాడు.

నాగార్జున స్ఫూర్తితో...
నాగార్జునకు ఒకటి, రెండేళ్ల వయసున్న ఇద్దరు చిన్నపిల్లలు ఉన్నారు. కరోనా సేవా కార్యక్రమాల్లో పాల్గొంటుండటంతో ఇంటికి దూరంగా ఉండేవాడు. తన వల్ల.. కుటుంబ సభ్యులకు, పిల్లలకు ఏం కాకూడదని, స్నేహితుల గదిలో ఉండేవాడు. ఒకవైపు భయంగా ఉన్నప్పటికీ.... తన కొడుకు వల్ల ఒకరి ప్రాణం నిలబడుతున్నందుకు సంతోషంగా ఉందంటున్నారు నాగార్జున తల్లి లక్ష్మీకుమారి. కరోనా సోకి ఆస్పత్రిలో చికిత్స పొందిన సమయంలోనూ స్నేహితుల ద్వారా నాగార్జున సేవా కార్యక్రమాలు నడిపించాడు. తన స్ఫూర్తితో చాలామంది ప్లాస్మాదానం చేయడానికి ముందుకు వస్తున్నారు.

ఇతరులకు సేవ చేయాలనే తపన ఉండాలే గానీ, ఎలాగైనా సహాయపడవచ్చని నాగార్జున నిరూపిస్తున్నాడు. కష్టకాలంలో నిస్వార్థంగా కృషి చేస్తున్న తనను పలువురు అభినందిస్తున్నారు.

ఇదీ చదవండి: