Boora Narsaiah Goud is confirmed to join BJP: తెరాస నేత, మాజీ ఎంపీ బూర నర్సయ్యగౌడ్‌ భాజపాలో చేరడం ఖాయమైంది. తన వర్గీయులతో దిల్లీ వెళ్లిన బూర... శుక్రవారం భాజపా అధ్యక్షుడు జేపీ నడ్డాను కలిసినట్లు సమాచారం. 2013లో తెరాసలో చేరిన బూర... 2014 లోక్‌సభ ఎన్నికల్లో భువనగిరి ఎంపీగా పోటీ చేసి గెలుపొందారు. 2019లో తెరాస నుంచి పోటీచేసిన ఆయన... కాంగ్రెస్‌ నేత కోమటిరెడ్డి వెంకట్‌రెడ్డి చేతిలో ఓడిపోయారు. మునుగోడు ఉపఎన్నిక తెరాస తరఫున టికెట్‌ ఆశించారు.
కూసుకుంట్ల ప్రభాకర్‌రెడ్డిని తెరాస అభ్యర్థిగా ప్రకటించడంతో బూర నర్సయ్య అసంతృప్తికి గురయ్యారు. ముఖ్యమంత్రి కేసీఆర్‌, మంత్రి కేటీఆర్‌ ఆయనతో మాట్లాడిన తర్వాత... తెరాస అభ్యర్థి విజయం కోసం కృషి చేస్తానని చెప్పారు. అసంతృప్తితో ఉన్న బూర నర్సయ్యను పార్టీలోకి చేర్చుకోవడానికి భాజపా ప్రయత్నించింది. మునుగోడు నియోజకవర్గంలో భారీ స్థాయిలో ఉన్న గౌడ సామాజికవర్గ ఓట్లను ఆకర్షించడానికి బూరతో చర్చలు జరిపింది. చర్చలు కొలిక్కిరావడంతో బూర నర్సయ్యగౌడ్‌ దిల్లీకి వెళ్లారు.
భాజపా జాతీయాధ్యక్షుడు జేపీ నడ్డాతో సమావేశమైనట్లు సమాచారం. ఇవాళ అమిత్‌షాను కలిసి కాషాయ కండువా కప్పుకోనున్నట్లు తెలుస్తోంది. వచ్చే ఎన్నికల్లో భువనగిరి నియోజకవర్గం నుంచి ఎమ్మెల్యే అభ్యర్ధిగా బూర నర్సయ్య పోటీ చేస్తారని... ఈ మేరకు భాజపా అధిష్ఠానం నుంచి హామీ లభించినట్లు ఆయన వర్గీయులు చెబుతున్నారు. తెరాస మాజీ ఎమ్మెల్సీ కర్నె ప్రభాకర్‌ అంశంపైనా కూడా తెరాసలో చర్చ జరుగుతోంది. బూర నర్సయ్య పార్టీ మార్పు నేపథ్యంలో కర్నెతో మాట్లాడానికి సంప్రదించగా ఆయన అందుబాటులోకి రానట్లు తెలుస్తోంది.
నేడు మునుగోడులో కిషన్‌రెడ్డి, ఈటల ప్రచారం.. రాష్ట్రానికి చెందిన భాజపా ముఖ్య నేతల ప్రచారం నేటి నుంచి మునుగోడు నియోజకవర్గంలో ప్రారంభం కానుంది. కేంద్ర పర్యాటక శాఖ మంత్రి కిషన్‌రెడ్డి చౌటుప్పల్‌ మున్సిపాలిటీలో, ఈటల రాజేందర్‌ చౌటుప్పల్‌ మండలం, రఘునందన్‌రావు మర్రిగూడ మండలం, బాబుమోహన్‌ నాంపల్లి మండలంలో ప్రచారం చేస్తారని.. మొత్తం 14 సభల్లో పాల్గొంటారని భాజపా తెలిపింది. 16న మునుగోడు మండలంలో కిషన్‌రెడ్డి, నాంపల్లి మండలంలో లక్ష్మణ్‌ ప్రచారం చేస్తారని పేర్కొంది.
ఇవీ చదవండి:
