ఆదాయపన్ను వసూళ్లలో తెలంగాణ రాష్ట్రం దేశంలో ఏడో స్థానంలో నిలవగా, ఆంధ్రప్రదేశ్ 14వ స్థానానికి పరిమితమైంది. దేశంలో ఈ ఏడాది ఫిబ్రవరి 15 వరకు రూ.9 లక్షల కోట్ల ఆదాయపన్ను కేంద్ర ఖజానాకు జమ కాగా అందులో తెలంగాణ నుంచి రూ.37,806 కోట్లు(4.1%), ఆంధ్రప్రదేశ్ నుంచి రూ.13,446 కోట్లు (1.4%) వసూలైనట్లు కేంద్ర ఆర్థికశాఖ సహాయమంత్రి అనురాగ్‌సింగ్‌ ఠాకూర్ తెలిపారు. ఈ మేరకు ఆయన సోమవారం లోక్సభలో ఓ లిఖితపూర్వక ప్రశ్నకు సమాధానం ఇచ్చారు.
తొలి స్థానంలో మహారాష్ట్ర
2016-17 నుంచి 2019-20 ఫిబ్రవరి 15 వరకు నాలుగేళ్లలో దేశ ఖజానాకు ఆదాయపన్ను కింద రూ.30.39 లక్షల కోట్లు రాగా అందులో 3.98% తెలంగాణ నుంచి, 1.57% ఆంధ్రప్రదేశ్ నుంచి వసూలైంది. దేశంలో గత మూడేళ్లలో ఆదాయపన్ను వసూళ్లు సగటున 13.14% వృద్ధి చెందగా తెలంగాణలో 15.16%, ఆంధ్రప్రదేశ్‌లో 11.95% వృద్ధి నమోదైంది. తెలంగాణలో నాలుగేళ్లలో 74,29,161 రిటర్న్స్‌ దాఖలు కాగా, తద్వారా రూ.1,21,193 కోట్లు ఆదాయపన్ను రూపంలో వసూలైంది. అంటే సగటున ఒక్కో అసెసీ నుంచి ఖజానాకు సగటున రూ.1.63 లక్షలు చేరినట్లు లెక్క. ఏపీ నుంచి నాలుగేళ్లలో 74,62,679 రిటర్న్స్‌ దాఖలు కాగా వసూలైన పన్ను మొత్తం మాత్రం రూ.47,823 కోట్లే. ఇక్కడ ఒక్కో రిటర్న్‌ నుంచి సగటున రూ.64,082 మాత్రమే వసూలైంది. ఆదాయపన్ను రూపంలో దేశ ఖజానాకు మహారాష్ట్ర నుంచి అత్యధికంగా 34.23% వాటా అందుతోంది. జనాభా పరంగా దేశంలో తొలిస్థానంలో ఉండే ఉత్తర్‌ప్రదేశ్‌ పన్ను విషయానికొచ్చేసరికి 9వ స్థానానికి పరిమితమైంది. బిహార్‌ చివరి వరుసలో నిలిచింది.
ఏఐబీపీ ప్రతిపాదనలేవీ రాలేదు: కేంద్రం
ఆయకట్టు ప్రాంత అభివృద్ధి, నీటి నిర్వహణ (సీఏడీడబ్ల్యూఎం), ఏఐబీపీల కింద కేంద్ర సాయం కోరుతూ ఆంధ్రప్రదేశ్ నుంచి ప్రస్తుత ఆర్థిక సంవత్సరంలో ప్రతిపాదనలేవీ రాలేదని కేంద్రం తెలిపింది. ఏపీలో ప్రధాన మంత్రి క్రిషి సింఛాయి యోజన (పీఎంకేఎస్‌వై)-ఏఐబీపీ, సీఏడీడబ్ల్యూఎం పథకంలో భాగంగా 8 ప్రాజెక్టులను చేపట్టినట్లు పేర్కొంది. భాజపా సభ్యుడు వైఎస్‌ చౌదరి అడిగిన ప్రశ్నకు కేంద్ర జలశక్తిశాఖ సహాయ మంత్రి రతన్‌లాల్‌ కటారియా సోమవారం రాజ్యసభలో లిఖితపూర్వక సమాధానమిచ్చారు.
స్వచ్ఛభారత్‌లో తెలుగు రాష్ట్రాలకు నిధులు
స్వచ్ఛ భారత్‌ మిషన్‌ (గ్రామీణ) పథకంలో భాగంగా తెలుగు రాష్ట్రాలకు 2014-15 నుంచి నిధులను విడుదల చేస్తున్నట్లు కేంద్రం తెలిపింది. ఆంధ్రప్రదేశ్‌కు 2018-19లో రూ.1381.11 కోట్లు, తెలంగాణకు రూ.515.05 కోట్లను విడుదల చేసినట్లు భాజపా సభ్యుడు టీజీ వెంకటేశ్‌ అడిగిన ప్రశ్నకు మంత్రి కటారియా సమాధానంగా చెప్పారు.
