Remand Report on Minister Murder Conspiracy case: తెలంగాణ మంత్రి శ్రీనివాస్ గౌడ్ హత్యకు కుట్ర కేసుకు సంబంధించిన రిమాండ్ రిపోర్టులో పోలీసులు పలు ఆసక్తికర విషయాలు పేర్కొన్నారు. మంత్రి శ్రీనివాస్గౌడ్తో పాటు అతడి అనుచరుడు హైదర్ అలీని అమరేందర్ రాజు సోదరులు హత్య చేయడానికి కుట్ర పన్నినట్లు పోలీసుల దర్యాప్తులో తేలింది.
ఫరూఖ్ను సంప్రదించటం..
మంత్రిని హత్య చేయడం కోసం తుపాకులు సమకూర్చుకోవడానికి తెలంగాణలోని రంగారెడ్డి జిల్లా శంషాబాద్కు చెందిన ఫరూఖ్ను అమరేందర్ రాజు సోదరులు సంప్రదించారు. గతేడాది నవంబర్ 18న ఫరూఖ్ ఓ ఎక్సైజ్ కేసులో భాగంగా మహబూబ్నగర్ కోర్టుకు వచ్చాడు. అమరేందర్ రాజు చిన్న సోదరుడు నాగరాజు.. ఫరూఖ్ను కలిసి తుపాకుల గురించి అడిగాడు. హైదర్తో పాటు అతడి రాజకీయ గురువు శ్రీనివాస్గౌడ్ను హత్య చేయడానికి తుపాకులు ఇప్పించాల్సిందిగా కోరారు. ఫరూఖ్ ఈ విషయాన్ని హైదర్ అలీకి తెలిపాడు.
అందరినీ అరెస్ట్ చేయటం..
కుట్ర విషయాన్ని బయటపెట్టిన ఫరూఖ్తో పాటు హైదర్ అలీని చంపేందుకు నాగరాజు, విశ్వనాథ్, యాదయ్య ప్రయత్నించి పేట్బషీరాబాద్ పోలీసులకు దొరికిపోయారు. గత నెల 27నే ముగ్గురిని అరెస్ట్ చేసి రిమాండ్కు తరలించారు. అసలు విషయం బయటపడటంతో.. పరారీలో ఉన్న రాఘవేందర్ రాజు, మధుసూదన్ రాజు, మున్నూరు రవి.. దిల్లీలోని జితేందర్ రెడ్డికి చెందిన అతిథి గృహంలో ఉన్నట్లు పోలీసులు గుర్తించారు. అక్కడికి వెళ్లి ముగ్గురిని అరెస్ట్ చేసి స్థానిక కోర్టులో హాజరుపర్చి హైదరాబాద్ తీసుకొచ్చారు. మైలార్దేవ్ పల్లిలోని ప్రగతినగర్లో ఉన్న అమరేందర్ రాజును అరెస్ట్ చేశారు.
హత్యకు కుట్ర ఎందుకంటే..?
కొన్నేళ్లుగా అమరేందర్ రాజు మహబూబ్నగర్ పట్టణంలో రాజకీయంగా పేరు సంపాదించుకున్నాడు. మార్కెట్ కమిటీ ఛైర్మన్గా బాధ్యతలు నిర్వర్తిస్తున్నాడు. అమరేందర్ సోదరులైన మధుసూదన్, రాఘవేందర్ రాజు, నాగరాజు పలు వ్యాపారాలు చేస్తున్నారు. మంత్రి శ్రీనివాస్ గౌడ్ రాజకీయ ప్రవేశంతో... అమరేందర్ రాజు క్రమంగా ప్రాభవం కోల్పోతూ వచ్చాడు. ఆర్థికంగా శ్రీనివాస్ గౌడ్ ఎన్నో ఇబ్బందులకు గురి చేశాడని రాఘవేందర్ రాజు పోలీసులకు తెలిపాడు. ఐదేళ్లుగా ఇబ్బందులు పడుతుండటంతో అమరేందర్ రాజు ప్రోద్బలంతో రాఘవేందర్ రాజు హత్యకు కుట్రపన్నాడు. మున్నూరు రవి మహబూబ్నగర్ మున్సిపాలిటీ ఎన్నికల్లో కౌన్సిలర్ టికెట్ ఆశించి భంగపడ్డాడు. రవి కూడా రాఘవేందర్ రాజుకు జత కలిశారు. రాఘవేందర్ రాజు స్నేహితులైన యాదయ్య, విశ్వనాథ్ కూడా కుట్రలో భాగస్వాములయ్యారు.
అడవుల్లో తుపాకులు..
రాఘవేందర్ రాజు, మున్నూరు రవి రెండు తుపాకులను కొనుగోలు చేశారు. వాటిని ఎక్కడ తెచ్చిన విషయాన్ని పోలీసులకు చెప్పలేదు. రెండు తుపాకులతో పాటు బుల్లెట్లను బౌరంపేట అడవుల్లో దాచిపెట్టారు. ఇద్దరినీ అరెస్ట్ చేసిన తర్వాత అడవుల్లో దాచిపెట్టిన రెండు తుపాకులను, బుల్లెట్లను పోలీసులు స్వాధీనం చేసుకున్నారు.
ఇదీ చదవండి:Telangana Realtors Murder Case: స్థిరాస్తి వ్యాపారులపై కాల్పుల కేసులో ఆరుగురు అరెస్టు
