క్లిష్ట పరిస్థితుల్లో నటుడు సోనూ సూద్ గొప్ప సాయం చేశారని తెదేపా జాతీయ ప్రధాన కార్యదర్శి నారా లోకేశ్ అభినందించారు. చిత్తూరు జిల్లా మహల్‌రాజపల్లిలో రైతు నాగేశ్వరరావు కష్టాలపై ఈటీవీ భారత్ కథనానికి స్పందిస్తూ సోనూసూద్ చేసిన ట్రాక్టర్ సాయాన్ని ఆయన కొనియాడారు. పేద కుటుంబం పట్ల చూపిన ఉదారతను మనస్ఫూర్తిగా అభినందిస్తున్నట్లు లోకేశ్ తన ట్విట్టర్లో పేర్కొన్నారు.
అసలేం జరిగింది...
చిత్తూరు జిల్లా కె.వి పల్లి మండలం మహల్ రాజపల్లికి చెందిన రైతు నాగేశ్వరరావు పొలంలో... ఆయన కుమార్తెలే కాడెద్దులుగా మారారు. వారు పని చేస్తున్న వీడియోను ట్విట్టర్లో సోనూసూద్కు ట్యాగ్ చేస్తూ.. కృష్ణమూర్తి అనే వ్యక్తి పోస్ట్ చేశాడు. రైతు కష్టం వీడియోకి... సోనూసూద్ స్పందించాడు. ఆ రైతును ఆదుకునేలా... రెండు ఎద్దులను కొనిస్తానని హామీ ఇచ్చి.. కాసేపటికే.. ఎద్దులకు బదులుగా ట్రాక్టర్ కొనిస్తానని ప్రకటించాడు. చెప్పిన కొన్ని గంటల్లోనే రైతు ఇంటికి ట్రాక్టర్ పంపించాడు.
