తెలంగాణ రాష్ట్రంలోని నాగార్జునసాగర్‌లో కృష్ణమ్మ సందడి మొదలైంది. శ్రీశైలం నుంచి భారీగా వరదనీరు వస్తుండటంతో నాగార్జున సాగర్ జలాశయం నిండుకుండలా మారింది. దీంతో అధికారులు ఈరోజు సాయంత్రం 14 క్రస్టు గేట్లను 5 అడుగుల మేరకు ఎత్తి దిగువకు నీరు విడుదల చేస్తున్నారు. నాగార్జున సాగర్ జలాశయానికి 5లక్షల 14 వేల 396 క్యూసెక్కుల ఇన్ఫ్లో వచ్చి చేరుతుండగా.. క్రస్టు గేట్లు ఎత్తి లక్ష క్యూసెక్కుల నీటిని విడుదల చేస్తున్నారు. సాగర్ పూర్తి సామర్థ్యం 312.0450 టీఎంసీలు కాగా, ప్రస్తుత నీటి నిల్వ 295.90 టీఎంసీలుగా ఉంది. నాగార్జునసాగర్‌ పూర్తిస్థాయి నీటిమట్టం 590 అడుగులు కాగా.. ప్రస్తుత నీటిమట్టం 584 అడుగులుగా ఉంది.
మధ్యాహ్నం ఎడమ కాలువకు నీటి విడుదల
ముఖ్యమంత్రి ఆదేశాలతో ఈ రోజు మధ్యాహ్నం నాగార్జున సాగర్ ఎడమకాలువకు నీటి విడుదల చేశారు. వానాకాలం పంటసాగు కోసం ఎమ్మెల్యే నోముల భగత్‌, రాజ్యసభ సభ్యులు బడుగుల లింగయ్యతో కలిసి 500 క్యూసెక్కుల నీటిని విడుదల చేశారు. దశలవారీగా నీటి విడుదల పెంచుతామని అధికారులు తెలిపారు. నాగార్జునసాగర్‌ జలాశయానికి భారీ వరద రావడంతో... ఎడమ కాలువ నీటికి విడుదల చేశారు. గతేడాది ఆగస్టు 11న సాగర్ ఎడమకాల్వకు నీరు ఇవ్వగా... ఈ ఏడాది పదిరోజుల ముందే నీటి విడుదల చేయడంతో రైతులు సంతోషం వ్యక్తం చేస్తున్నారు.
భారీగా తరలివస్తున్న పర్యాటకులు
సాగర్ క్రస్టు గేట్లు ఎత్తడంతో పర్యాటకులు భారీగా తరలివస్తున్నారు. అధికారులు గేట్లు ఎత్తుతుండగా.. ఆ ప్రవాహాన్ని చూసి కేరింతలు కొట్టారు. భారీ ప్రవాహం నేపథ్యంలో పర్యాటకులు జాగ్రత్తగా ఉండాలని పోలీసులు సూచించారు. కరోనా నేపథ్యంలో మాస్కులు ధరించాలని సూచించారు.
వరద ఉద్ధృతి
శ్రీశైలం, సాగర్, పులిచింతల నుంచి పెద్ద ఎత్తున వరద నీరు ప్రకాశం బ్యారేజ్‌కి వస్తుంది. ఇవాళ సాయంత్రానికి ప్రకాశం బ్యారేజ్‌కు సుమారు లక్ష క్యూసెక్కులు, రేపటి వరకు సుమారు 5 లక్షల క్యూసెక్కుల వరద నీరు వచ్చే అవకాశం ఉందని ఏపీ మంత్రి పేర్ని నాని వెల్లడించారు. భారీగా వరద నీరు వచ్చే అవకాశం ఉన్నందున కృష్ణా నది తీరప్రాంత ప్రజలు అప్రమత్తంగా ఉండాలని మంత్రి సూచించారు.
ఇదీ చదవండి:
AP Weather forecast: రాష్ట్రంలో రాగల మూడు రోజుల్లో తేలికపాటి వర్షాలు
