కరోనాపై తెలంగాణ వైద్య విభాగం 4 రోజులుగా అప్రమత్తంగా ఉందని మంత్రి ఈటల రాజేందర్ అన్నారు. ప్రజలకు అవగాహన కల్పించడంలో మీడియా బాగా సహకరించిందన్నారు. కొవిడ్-19ను ఎదుర్కోవడానికి ప్రత్యేక కమిటీలు వేశామని.. తెలంగాణ రాష్ట్ర ప్రభుత్వ చర్యలను చూసి కేంద్రం కితాబిచ్చిందని తెలిపారు.
ఎలాంటి పరిస్థితులు వచ్చినా ఎదుర్కొనే సత్తా తెలంగాణ ప్రభుత్వానికి ఉందని మంత్రి ఈటల వెల్లడించారు. ఈ వైరస్ గాలితో వచ్చేది కాదన్నారు. కరోనా వచ్చిందంటూ సాఫ్ట్‌వేర్‌ కార్యాలయాన్ని ఖాళీ చేశారని చెప్పారు. ఎప్పుడూ అతిగా స్పందించవద్దంటూ హితవు పలికారు. ఇప్పటివరకు తెలంగాణలో ఒక్కరికి కూడా కరోనా రాలేదని.. గాంధీలో ఉన్న వ్యక్తికి కరోనా దుబాయిలో వచ్చిందని తెలిపారు. ఆ వ్యక్తి 2 రోజుల్లో డిశ్చార్జ్‌ అయ్యే అవకాశం ఉందని చెప్పారు.
మొత్తం 21 నమూనాలు నెగిటివ్‌ వచ్చాయని, ఈరోజు కొత్తగా వైద్యులు 10మంది నమూనాలు తీసుకున్నారని పేర్కొన్నారు. విదేశాల నుంచి వచ్చిన వారు 'మాకు పరీక్షలు చేయండి' అంటున్నారని, ఆ విధంగా ఇన్ఫెక్షన్ లేకున్నా పరీక్షలు చేయడం కుదరదని ఈటల చెప్పారు. ఐసోలేషన్‌కు సిద్ధంగా ఉన్నట్లు అన్ని మెడికల్‌ కళాశాలలు చెప్పాయని పేర్కొన్నారు. ఈ వైరస్ను ఎదుర్కొనేందుకు అన్ని విభాగాలు, తాము ఎప్పుడూ సిద్ధంగానే ఉంటామని మంత్రి స్పష్టం చేశారు.
ఇవీ చూడండి: గ్రామాల్లో బెల్టు షాపులు ఉండకూడదు: సీఎం
