అప్పు ఎక్కువైనా పేదవారిని ఆదుకోవటమే ప్రభుత్వ లక్ష్యం: మంత్రి బుగ్గన

పేద, మధ్య తరగతి వారికి ఆదుకోవటమే లక్ష్యంగా ప్రభుత్వం అనేక పథకాలను తీసుకువచ్చిందని ఆర్థిక మంత్రి బుగ్గన రాజేంద్రనాథ్ రెడ్డి అన్నారు. కొవిడ్ నేపథ్యంలో అప్పు కాస్త ఎక్కువైనప్పటికీ.. ఆ వర్గాలను ఆదుకోవటమే లక్ష్యంగా ప్రభుత్వం ఆలోచించిందని స్పష్టం చేశారు.

రాష్ట్రాలూ కొవిడ్‌ వల్ల అప్పులు చేయాల్సి వచ్చిందని చెప్పారు. కొవిడ్‌ వల్ల ప్రపంచమంతా ఇలాగే ఉందని, ఆ విషయం ప్రపంచం మొత్తానికి తెలుసునని అన్నారు. ఏటా రూ.6లక్షల కోట్ల అప్పులు చేసే కేంద్రం.. ఈ ఏడాది రూ.12 లక్షల కోట్లు అప్పు చేసిందని గుర్తుచేశారు. పత్రికలలోను, ప్రతిపక్ష నేత చంద్రబాబు రాష్ట్రం అప్పులు చేస్తోందని ప్రచారం చేస్తున్నట్లు ఆయన శుక్రవారం విజయవాడలో విలేకర్లతో అన్నారు. కొవిడ్‌ సమయంలో మార్చి, ఏప్రిల్‌ నెలల్లో మొత్తం ఆర్థిక వ్యవస్థ స్తంభించిందని, ఆ సమయంలో ముఖ్యమంత్రి జగన్‌ ప్రజలకు మరింత అండగా నిలవాలని నిర్ణయించారని అన్నారు. కొన్ని రాష్ట్రాలు సంక్షేమ పథకాలు నిలిపివేస్తే మన ముఖ్యమంత్రి ఈ సమయంలోనే పేదలకు అండగా ఉండేలా పథకాలు అమలు చేయాల్సిందేనని చెప్పారన్నారు. వివిధ పథకాల రూపంలో ప్రజలకు రూ.కోట్ల సొమ్ములు అందించడం వల్ల ఆ నిధులు ఆర్థిక వ్యవస్థలోకి వచ్చి గాడిన పడుతోందని, ఆర్థికవేత్తలూ ఇదే విషయం చెప్పారని అన్నారు. పేదలకు సాయం చేసేందుకే అప్పులు చేశామని గర్వంగా చెబుతున్నామని బుగ్గన ప్రకటించారు. ఏప్రిల్‌, మే నెలల్లో ఆదాయాలు లేకపోయినా ప్రజలకు నేరుగా లబ్ధి కల్పించామన్నారు.

పరిమితి దాటింది నిజమే

రాష్ట్ర స్థూల ఉత్పత్తిలో రుణాల వాటా 28% మించకూడదని, ప్రస్తుతం 32.7% ఉందని మంత్రి చెప్పారు. అదే సమయంలో పంజాబ్‌ (38.7), రాజస్థాన్‌ (34.5), ఉత్తర్‌ప్రదేశ్‌ (33.1), పశ్చిమబెంగాల్‌ (34.7) మన కన్నా దారుణంగా ఉన్నాయన్నారు. ద్రవ్యలోటు క్రమేణా తగ్గుతోందని చెప్పారు. మొదటి త్రైమాసికంలో మైనస్‌ 12.96% ఉంటే నాలుగో త్రైమాసికానికి మైనస్‌ 3%కు తగ్గించగలిగామని చెప్పారు. జీఎస్టీ వసూళ్లలో దేశంలో రెండోస్థానంలో ఉన్నామన్నారు. ఈ విషయంలో జాతీయసగటు కన్నా రాష్ట్ర సగటు ఎక్కువగా ఉందన్నారు.

టీజీ వెంకటేష్‌ కొడుకుతో కలిసి చంద్రబాబు ప్రచారమా?

కర్నూలులో టీజీ వెంకటేష్‌ కొడుకుతో కలిసి చంద్రబాబు ప్రచారం చేస్తున్నారని, ప్రస్తుతం టీజీ వెంకటేష్‌ రాజ్యసభ సభ్యునిగా భాజపాలో ఉన్నారని బుగ్గన అన్నారు. తన పార్టీలో అసలు ఎవరున్నారో చంద్రబాబుకు గుర్తుందా అని ప్రశ్నించారు. కర్నూలు అభివృద్ధి, తన అవినీతిపై చంద్రబాబు విమర్శలు చేస్తున్నారంటూ అవినీతిపై బహిరంగ చర్చకు తాను సిద్ధమన్నారు. తాను ఇప్పటికీ పాత ఇన్నోవా కారులో తిరుగుతున్నానని అన్నారు. తన కుటుంబం 100 ఏళ్లుగా మైనింగులో ఉందన్నారు. తాను ఒక అపార్టుమెంటులో ఉంటానని, చంద్రబాబు రూ.100 కోట్లతో ఇల్లు కట్టుకున్నారని అన్నారు.

ఇదీ చదవండి