Medical staff irresponsibility: 'ఆ కారణంతో ప్రసవం చేయకుండా పంపించారు..'

Medical staff irresponsibility: మానవత్వానికి మారుపేరుగా చెప్పుకునే వైద్యసిబ్బంది కూడా.. కొన్నిసార్లు ఆ పదాన్ని మర్చిపోయి ప్రవర్తిస్తున్నారు. ఎంతటి ప్రాణాంతక జబ్బు సోకినా.. ప్రాణాలకు తెగించి రోగులను కాపాడటమే ప్రథమ లక్ష్యంగా పెట్టుకునే వైద్యులు అప్పుడప్పుడు బాధ్యత విస్మరిస్తున్నారు. నెలలు నిండిన ఓ గర్భిణీకి హెచ్​ఐవీ ఉందన్న కారణంతో.. ప్రసవం చేసేందుకు నిరాకరించిన అమానుష ఘటన తెలంగాణలోని సూర్యాపేట జిల్లా కోదాడలో చోటుచేసుకుంది.

Medical staff irresponsibility: మానవత్వమే మొదటి లక్షణం వారిది.. కారణాలు చూపకుండా కాపాడాల్సిన బాధ్యత వాళ్లది.. ప్రాణాంతక రోగాలతో పోరాడి రోగులను కాపాడాల్సిన యోధులు వాళ్లు.. వైద్యసిబ్బంది గురించి మనమంతా.. ఇంత గొప్పగా చెప్పుకుంటుంటే.. వీళ్లు మాత్రం ఇవన్నీంటినీ మడిచి చెత్తబుట్టలో పడేశారు. కనికరమే లేకుండా.. కారణాలు చెప్పి చేతులు దులిపేసుకున్నారు. హెచ్ఐవీ ఉందన్న కారణంతో గర్భిణీకి ప్రసవం చేయకుండా నిరాకరించి.. పొడిగిన నోళ్లతోనే తిట్టించుకుంటున్నారు.

ఈ అమానుష ఘటన తెలంగాణలోని సూర్యాపేట జిల్లా కోదాడ ప్రభుత్వ ఆసుపత్రిలో చోటుచేసుకుంది. కోదాడకు చెందిన ఓ మహిళకు నెలలు నిండి పురిటి నొప్పులు రావడంతో సామాజిక ఆరోగ్య కేంద్రానికి వెళ్లింది. ముందు చేసిన పరీక్షల రిపోర్టులు పరిశీలించగా.. బాధితురాలికి హెచ్ఐవీ ఉన్నట్లు తేలింది. ప్రసవం చేసేందుకు తమ దగ్గర కిట్లు లేవని వైద్యసిబ్బంది చెప్పారు. వెంటనే సూర్యాపేట ప్రభుత్వ ఆసుపత్రికి వెళ్లాలని బాధితురాలి కుటుంబసభ్యులకు సూచించారు.

చేసేదేమీలేక పురిటి నొప్పులతో తల్లడిల్లిపోతున్న బాధితురాలిని కుటుంబసభ్యులు హుటాహుటిన 108లో సూర్యాపేటకు పయనమయ్యారు. ఆస్పత్రికి తరలిస్తుండగా.. మార్గ మధ్యలోనే మహిళకు ప్రసవమైంది. పండంటి మగబిడ్డకు బాధితురాలు జన్మనిచ్చింది. కానీ.. సకాలంలో ఆసుపత్రికి చేరుకోకపోవడంతో శిశువు పరిస్థితి విషమించింది. వెంటనే.. శిశువును హైదరాబాద్ ఆసుపత్రికి తరలించారు.

నొప్పులతో బాధపడుతుందని కూడా చూడకుండా హెచ్ఐవీ ఉందన్న కారణంతో కోదాడ వైద్య సిబ్బందే పంపించేశారని కుటుంబ సభ్యులు ఆరోపించారు. మరోవైపు.. కుటుంబసభ్యులే బాధితురాలిని సూర్యాపేటకు తరలించారని వైద్యులు చెబుతున్నారు.

మరి.. కోదాడ వైద్యసిబ్బంది దగ్గర నిజంగానే కిట్లు లేవా..? ఒకవేళ కిట్లు లేకుంటే.. నొప్పులతో తల్లడిల్లిపోతున్న గర్భిణీని ఏమాత్రం బాధ్యత లేకుండా పంపించేస్తారా..? లేకపోతే.. కిట్లు ఉన్నా హెచ్​ఐవీ సోకిన మహిళకు వైద్యం చేయటం ఇష్టం లేకనే సూర్యాపేట పంపించారా..? ఒకవేళ నిజంగానే కిట్లు లేకపోయింటే.. బయటనుంచి తెప్పించుకోనైనా ప్రసవం చేయాల్సిన బాధ్యత లేదా..? కిట్ల ఖరీదు.. రెండు ప్రాణాల ఖరీదు కంటే భరించలేనంత ఎక్కువా..? అంబులెన్స్​లో ప్రసవం జరిగింది కాబట్టి.. అంతా సవ్యంగా జరిగితే సరే.. ఒకవేళ విషమంగా ఉన్న శిశువుకు ఏమైనా జరిగితే ఆ బాధ్యత ఆ వైద్య సిబ్బంది తీసుకుంటారా..? అంటూ స్థానికులు రకరకాలు ప్రశ్నలు సంధిస్తున్నారు.

ఇదీ చూడండి: