మినీ పుర పోరుకు తెలంగాణ రాష్ట్ర ఎన్నికల సంఘం నోటిఫికేషన్ జారీ చేసింది. 2 కార్పొరేషన్లు, 5 మున్సిపాలిటీల్లో ఎన్నికలకు నోటిఫికేషన్ జారీ అయింది. గ్రేటర్‌ వరంగల్‌, ఖమ్మం నగరపాలికలతో పాటు సిద్దిపేట, అచ్చంపేట, జడ్చర్ల, కొత్తూరు, నకిరేకల్‌ పురపాలికల ఎన్నికలకు నోటిఫికేషన్ ఇచ్చింది. రేపటి నుంచి ఈ నెల 18 వరకు నామినేషన్లు స్వీకరించనుండగా... ఈ నెల 19న అభ్యర్థుల నామపత్రాలు పరిశీలించనున్నారు. ఈ నెల 22 వరకు నామినేషన్ల ఉపసంహరణకు అవకాశం ఇచ్చారు.
ఈ నెల 30న 2 కార్పొరేషన్లు, 5 మున్సిపాలిటీల్లో పోలింగ్ జరగనుంది. మే 3న ఓట్ల లెక్కింపు చేపడతారు. వివిధ కారణాలతో ఖాళీ అయిన డివిజన్లకు సైతం నోటిఫికేషన్ జారీ చేశారు. జీహెచ్ఎంసీ పరిధిలోని లింగోజిగూడ డివిజన్‌కు ఉపఎన్నిక సహా... మరో 8 మున్సిపాలిటీల్లో ఒక్కో వార్డుకు నోటిఫికేషన్ జారీ అయింది. గజ్వేల్, నల్గొండ, జల్‌పల్లి, అలంపూర్‌, బోధన్, పరకాల, మెట్‌పల్లి, బెల్లంపల్లిలో ఒక్కో వార్డుకు ఎన్నికలు జరగనున్నాయి.
సిద్ధిపేట పాలకమండలి పదవీకాలం ఇవాళ్టితో పూర్తి కానుంది. జడ్చర్ల, కొత్తూరు, నకిరేకల్‌ మున్సిపాలిటీలు కొత్తగా ఏర్పడ్డాయి. ఈ కారణంగా.. 2 కార్పొరేషన్లు, 5 మున్సిపాలిటీల్లో ఎన్నికల నిర్వహణకు ఇప్పటికే ఎన్నికల సంఘం అవసరమైన ఏర్పాట్లు పూర్తి చేసింది. ఇవాళ ఉదయం వార్డుల వారీ రిజర్వేషన్లను రాజకీయ పార్టీల ప్రతినిధుల సమక్షంలో ఆయా జిల్లాల కలెక్టర్లు ప్రకటించారు.
ఇదీ చూడండి:
